گلگت بلتستان کی قانون ساز اسمبلی کی مدت مکمل ہونے کے بعد نامزد نگران وزیراعلیٰ جسٹس (ر) یار محمد نے اپنے عہدے کا حلف اٹھالیا۔
گورنر گلگت بلتستان سید مہدی شاہ نے جسٹس (ر) یار محمد سے نگران وزیراعلیٰ کا حلف لیا۔
حلف برداری کے بعد میڈیا سے مختصر گفتگو کرتے ہوئے جسٹس (ر) یار محمد نے کہا کہ ان کی پہلی ترجیح صاف، شفاف اور غیر جانب دار انتخابات کا انعقاد ہے اور اس مقصد کے لیے وہ پوری لگن سے کام کریں گے۔
نگران کابینہ کی تشکیل سے متعلق ان کا کہنا تھا کہ وہ مشاورت اور غور و فکر کے بعد کابینہ میں اہل، دیانت دار اور قابل افراد کو شامل کریں گے۔
واضح رہے کہ جسٹس (ر) یار محمد کا تعلق گلگت بلتستان کے ضلع استور سے ہے۔
حلف برداری کی تقریب میں وفاقی وزیر امور کشمیر، گلگت بلتستان اور سیفران امیر مقام نے خصوصی طور پر شرکت کی، جبکہ جسٹس صاحبان، سابق وزیراعلیٰ حاجی گلبر خان، اسپیکر گلگت بلتستان اسمبلی نذیر احمد، سابق وزرا، چیف سیکریٹری ابرار احمد مرزا، صوبائی سیکریٹریز، سیاسی و سماجی شخصیات اور میڈیا نمائندگان بھی موجود تھے۔
