اوکاڑہ: پولیس کے مطابق اوکاڑہ کے علاقے رائے پور، چک نمبر 40/GD میں ناشتے کی تیاری کے معاملے پر پیش آنے والے مبینہ واقعے میں 10 سالہ بچی جاں بحق ہوگئی۔
پولیس کے مطابق بچی کی والدہ بشریٰ بی بی نے مبینہ طور پر اسے ناشتہ تیار کرنے کے لیے کہا۔ بچی کے انکار پر مبینہ طور پر خاتون نے اس پر چاقو سے حملہ کیا، جس کے نتیجے میں بچی شدید زخمی ہوگئی۔
بچی کو علاج کے لیے ڈسٹرکٹ ہیڈکوارٹر اسپتال اوکاڑہ منتقل کیا گیا، تاہم وہ جانبر نہ ہوسکی۔
اطلاع ملنے پر پولیس اسپتال پہنچی اور بچی کی لاش کو پوسٹ مارٹم کے لیے مردہ خانے منتقل کردیا۔ پولیس نے بچی کی والدہ کو گرفتار کرکے واقعے کی تحقیقات شروع کردی ہیں۔
دوسری جانب ذرائع کا دعویٰ ہے کہ بچی عموماً اپنی پھوپھی کے گھر رہتی تھی اور واقعے کے روز اپنی والدہ کے گھر آئی تھی۔ ذرائع کے مطابق ممکنہ طور پر بچی کو اس کے بھائی نے نقصان پہنچایا جبکہ والدہ نے اپنے بیٹے کو بچانے کے لیے مبینہ طور پر ذمہ داری قبول کی۔
پولیس کا کہنا ہے کہ واقعے کے تمام پہلوؤں سے تحقیقات کی جارہی ہیں اور پوسٹ مارٹم رپورٹ سمیت دستیاب شواہد کی بنیاد پر مزید قانونی کارروائی کی جائے گی۔
