پاکستان پیپلز پارٹی کے سینئر رہنما قمر زمان کائرہ نے کہا ہے کہ حکومت کو سہارا دینے کا مطلب یہ نہیں کہ مسلم لیگ (ن) جو چاہے کرے اور پیپلز پارٹی کچھ نہ کہے۔
لاہور میں پریس کانفرنس سے خطاب کرتے ہوئے کائرہ نے کہا کہ پیپلز پارٹی نے وزارتیں لیے بغیر نیک نیتی کے ساتھ حکومت کا ساتھ دیا، لیکن اس کا یہ مطلب نہیں کہ حکومت ہر فیصلہ تنہا کرے اور ہم خاموش تماشائی بنے رہیں۔
ان کا کہنا تھا کہ حالیہ دنوں میں سیاسی لہجہ غیر ضروری طور پر سخت ہوتا جا رہا ہے، اس رویے سے نہ جمہوریت کو فائدہ ہوگا اور نہ ہی ملک کے مسائل حل ہوں گے۔ “پاکستان پہلے ہی دہشت گردی اور معاشی بحران جیسے مسائل کا شکار ہے، اس وقت ہمیں تلخیوں کے بجائے اتحاد کی ضرورت ہے۔”
قمر زمان کائرہ نے کہا کہ اگرچہ سیلاب کے دوران حکومت پنجاب اور سندھ نے اچھا کام کیا جس کی پیپلز پارٹی نے تعریف کی، لیکن جہاں خامیاں ہوں گی وہاں تنقید بھی کی جائے گی۔
انہوں نے وزیراعلیٰ پنجاب کے پیپلز پارٹی کے بارے میں حالیہ بیان کو مایوس کن قرار دیا اور کہا کہ “ہم عزت کے ساتھ سیاست کرنا چاہتے ہیں۔”
پیپلز پارٹی رہنما نے مزید کہا کہ بلاول بھٹو زرداری انتہائی صبر اور تحمل سے معاملات آگے بڑھا رہے ہیں، اور پارٹی کا مقصد صرف عوام کے مسائل کا حل تلاش کرنا ہے۔
