کوئٹہ – بلوچستان کے ضلع مستونگ کے مرکزی بازار میں واقع ایک نجی بینک میں دن دہاڑے ڈکیتی کی بڑی واردات ہوئی، جہاں مسلح افراد پندرہ لاکھ ساٹھ ہزار روپے لے کر فرار ہوگئے۔
پولیس ذرائع کے مطابق 6 سے 8 مسلح ملزمان اچانک بینک میں داخل ہوئے، عملے کو یرغمال بنایا اور کیش کاؤنٹر سے رقم نکالنے کے بعد موقع سے فرار ہوگئے۔ اچانک پیش آنے والے واقعے کے باعث بازار میں خوف و ہراس پھیل گیا اور دکانداروں نے اپنی دکانیں بند کردیں۔
اطلاع ملتے ہی پولیس اور سکیورٹی فورسز کی بھاری نفری موقع پر پہنچ گئی اور علاقے کو گھیرے میں لے کر تحقیقات شروع کردی۔ پولیس حکام کا کہنا ہے کہ واقعے کی تمام پہلوؤں سے تفتیش جاری ہے اور ملزمان کی گرفتاری کے لیے کارروائیاں کی جارہی ہیں۔
