اسلام آباد – فیڈرل بورڈ آف انٹرمیڈیٹ اینڈ سیکنڈری ایجوکیشن (FBISE) نے ایک نیا 10 درجوں پر مشتمل گریڈنگ نظام متعارف کرایا ہے، جو پہلے سالانہ امتحانات 2026 سے ایس ایس سی پارٹ ون (SSC-I) اور ایچ ایس ایس سی پارٹ ون (HSSC-I) کے لیے نافذ ہوگا، جبکہ 2027 سے یہ نظام ایس ایس سی پارٹ ٹو (SSC-II) اور ایچ ایس ایس سی پارٹ ٹو (HSSC-II) پر بھی لاگو ہوگا۔
یہ فیصلہ انٹر بورڈ کوآرڈینیشن کمیشن (IBCC) کے 182ویں اجلاس میں اگست 2025 میں منظور کیا گیا، جس کا مقصد طلبہ کے نتائج کو زیادہ شفاف اور جامع بنانا ہے۔
ایف بی آئی ایس ای کی جانب سے 7 اکتوبر 2025 کو جاری کردہ نوٹیفکیشن کے مطابق، نئے گریڈنگ نظام میں 96 تا 100 فیصد نمبروں پر A++، 91 تا 95 فیصد پر A+ اور 86 تا 90 فیصد پر A گریڈ دیا جائے گا۔ گریڈنگ کا سلسلہ D (40 تا 50 فیصد) تک جاری رہے گا، جبکہ 40 فیصد سے کم نمبر حاصل کرنے والے طلبہ کو U (Ungraded) قرار دیا جائے گا۔
نوٹیفکیشن میں مزید کہا گیا ہے کہ جن طلبہ کو Ungraded (U) قرار دیا جائے گا، انہیں متعلقہ مضمون کا دوبارہ امتحان دینا ہوگا، بشرطیکہ وہ دیگر شرائط پوری کرتے ہوں۔
