تحریک لبیک پاکستان (ٹی ایل پی) نے لاہور سے اپنا احتجاجی مارچ اسلام آباد کی جانب شروع کر دیا ہے، جس کا مقصد امریکی سفارتخانے کے باہر اسرائیل مخالف دھرنا دینا ہے۔ مارچ کے آغاز پر لاہور کے مختلف علاقوں میں پولیس اور مظاہرین کے درمیان شدید جھڑپیں ہوئیں، جن میں متعدد اہلکار اور کارکن زخمی ہوئے۔
لاہور میں تصادم
میڈہاذرائع کے مطابق جمعے کی شام مظاہرین چوبرجی چوک پر پولیس رکاوٹیں ہٹانے کی کوشش کر رہے تھے، جس دوران لاٹھی چارج، شیلنگ اور پتھراؤ کے واقعات پیش آئے۔
ایدھی کے ترجمان یونس بھٹی کے مطابق جھڑپوں میں کئی پولیس اہلکار زخمی ہوئے، جنہیں مختلف اسپتالوں میں منتقل کیا گیا۔
ٹی ایل پی ترجمان عثمان نوشاہی نے دعویٰ کیا کہ ان کا ایک کارکن جاں بحق اور 22 دیگر زخمی ہوئے۔
حکومتی مؤقف
وزیرِ مملکت برائے داخلہ طلال چوہدری نے ٹی ایل پی کے احتجاج کو "تشدد پر مبنی سیاست” قرار دیتے ہوئے کہا کہ جتھوں کے ذریعے دباؤ ڈالنا کسی بھی مہذب ملک میں قابلِ قبول نہیں۔
انہوں نے الزام لگایا کہ ٹی ایل پی کارکن پولیس اور رینجرز اہلکاروں پر لاٹھیوں، کیمیکل اور کیلوں والی ٹینس بالز سے حملہ کر رہے تھے، جس سے درجنوں اہلکار زخمی ہوئے۔
ان کا کہنا تھا کہ جب فلسطینی عوام خود جنگ بندی سے مطمئن ہیں تو یہ احتجاج بلا جواز ہے۔
اسلام آباد میں سیکیورٹی ہائی الرٹ
مارچ کے پیشِ نظر وفاقی دارالحکومت اسلام آباد میں سخت سیکیورٹی اقدامات کیے گئے۔ وزارتِ داخلہ کی ہدایت پر 9 اکتوبر کی رات سے اسلام آباد اور راولپنڈی میں موبائل انٹرنیٹ (3G/4G) سروسز غیرمعینہ مدت کے لیے معطل کر دی گئیں۔
اسلام آباد ٹریفک پولیس نے فیض آباد اور ریڈ زون کے اطراف متبادل ٹریفک پلان جاری کیا، جبکہ 500 سے زائد کنٹینرز سڑکوں پر رکھ کر راستے بند کیے گئے۔
ذرائع کے مطابق 7 ہزار سے زائد اہلکار — جن میں پولیس، ایف سی اور رینجرز شامل ہیں — شہر میں تعینات ہیں، اور 280 سے زائد مظاہرین کو گرفتار کیا گیا ہے۔
پنجاب میں دفعہ 144 نافذ
محکمہ داخلہ پنجاب نے صوبے میں 10 دن کے لیے دفعہ 144 نافذ کر دی ہے۔
حکمنامے میں کہا گیا ہے کہ خفیہ رپورٹس کے مطابق امن عامہ کو سنگین خطرات لاحق ہیں اور کالعدم تنظیمیں جیسے ٹی ٹی پی، بی ایل اے اور داعش کسی بھی وقت تخریبی کارروائیاں کر سکتی ہیں۔
ریلیوں، دھرنوں، جلسوں، اسلحے کی نمائش، نفرت انگیز تقاریر اور لاؤڈ اسپیکر کے غلط استعمال پر مکمل پابندی عائد کر دی گئی ہے۔
لاہور میں پنجاب یونیورسٹی آج بند رہی جبکہ پنجاب پبلک سروس کمیشن نے 11 اور 12 اکتوبر کے امتحانات ملتوی کر دیے ہیں۔
امریکی سفارتخانے کی وارننگ
احتجاج سے قبل امریکی سفارتخانے نے اپنے شہریوں کو خبردار کیا تھا کہ 10 اکتوبر کو پاکستان بھر میں احتجاجی سرگرمیاں ممکن ہیں، اس لیے وہ بڑے اجتماعات اور ریلیوں سے گریز کریں۔
