پشاور: تھانہ شاہ پور پولیس نے ٹیلر ماسٹر اسرار گل کے اندھے قتل کیس کو حل کرتے ہوئے مرکزی ملزم اور اس کے سہولت کار کو گرفتار کرلیا ہے۔
کیپٹل سٹی پولیس پشاور کے ترجمان کے مطابق ایس ایچ او تھانہ شاہ پور عمران خان نے تفتیشی ٹیم کے ہمراہ جدید سائنسی خطوط اور ٹیکنیکل بنیادوں پر کامیاب کارروائی کرتے ہوئے دونوں ملزمان کو گرفتار کیا۔
گرفتار مرکزی ملزم کی شناخت عامر ولد صفدر اور سہولت کار کی شناخت غریب جان عرف غریبو ولد امیر سید کے نام سے ہوئی ہے، دونوں کا تعلق اکبر پورہ سے ہے۔
مرکزی ملزم کی نشاندہی پر پولیس نے مقتول کا موبائل فون اور آلۂ قتل (پستول) بھی برآمد کرلیا۔
یہ افسوسناک واقعہ 6 اکتوبر 2025 کو تھانہ شاہ پور کی حدود بدھنی ٹاپو سیفن غاڑہ میں پیش آیا تھا، جہاں اسرار گل ولد دیدار گل کو فائرنگ کرکے قتل کر دیا گیا تھا۔
واقعے کے بعد مقتول کے بھائی ابرار گل کی مدعیت میں مقدمہ درج کرکے تفتیش کا آغاز کیا گیا۔
تفتیش کے دوران یہ انکشاف ہوا کہ مرکزی ملزم عامر مقتول کا سابقہ شاگرد تھا۔
پولیس نے سائنسی بنیادوں، اہم شواہد، موبائل ڈیٹا اور دیگر تکنیکی ذرائع استعمال کرتے ہوئے ملزمان تک رسائی حاصل کی۔
ابتدائی تفتیش میں مرکزی ملزم نے جرم کا اعتراف کرلیا ہے، جبکہ دونوں گرفتار ملزمان سے مزید تفتیش جاری ہے۔
