پشاور: تھانہ بھانہ ماڑی پولیس نے اسٹریٹ کرائم اور منشیات فروشی کی مختلف وارداتوں میں ملوث چار ملزمان کو گرفتار کر کے لاکھوں روپے مالیت کی منشیات اور چھینی گئی نقدی برآمد کر لی۔
کیپٹل سٹی پولیس پشاور کے ترجمان کے مطابق، اعلیٰ افسران کی خصوصی ہدایات کی روشنی میں پشاور بھر میں اسٹریٹ کرائم اور منشیات فروشوں کے خلاف کریک ڈاؤن مزید تیز کر دیا گیا ہے۔
کارروائی کے دوران رشید گڑھی کے رہائشی حیدر ولد دلاور اور کینٹ صدر کے رہائشی محمد عمران ولد فتح محمد کو گرفتار کیا گیا، جو اسٹریٹ کرائم، خصوصاً چھینا جھپٹی کی وارداتوں میں ملوث تھے۔
پولیس نے ملزمان کے قبضے سے 42 ہزار روپے کی چھینی گئی رقم اور وارداتوں میں استعمال ہونے والا پستول برآمد کر لیا۔
منشیات کے خلاف کارروائی کے دوران ڈاگ حسین کے رہائشی اسفندیار ولد غلام حسین اور ڈھیری باغبانان کے رہائشی سرتاج ولد انور تاج کو گرفتار کیا گیا۔
یہ دونوں منشیات فروش مخصوص گاہکوں کو آئس اور دیگر منشیات فراہم کرنے میں ملوث تھے، اور دیگر تھانوں کو بھی مطلوب تھے۔
گرفتار ملزمان کے قبضے سے مجموعی طور پر 2,300 گرام آئس اور 4,500 گرام چرس بھی برآمد کر لی گئی ہے۔
مزید تفتیش جاری ہے۔
