تھانہ نصیرآباد کی حدود میں رات گئے چار موٹر سائیکل سوار ملزمان نے پولیس پارٹی پر فائرنگ کر دی۔ جوابی کارروائی میں دو خطرناک اور مطلوب ڈاکو زخمی حالت میں گرفتار کر لیے گئے، جبکہ دو ملزمان فرار ہو گئے۔
پولیس نے ملزمان کے زیر استعمال موٹر سائیکل اور غیر قانونی اسلحہ برآمد کر لیا۔
زخمی ملزمان کو فوری طور پر اسپتال منتقل کیا گیا، جہاں ایک ڈاکو زخموں کی تاب نہ لاتے ہوئے جاں بحق ہو گیا۔ ہلاک ڈاکو کی شناخت حبیب اللہ کے نام سے ہوئی ہے۔
فائرنگ کے تبادلے کے دوران کانسٹیبل امجد حسین کو بھی گولی لگی، تاہم وہ بلٹ پروف جیکٹ پہننے کی وجہ سے محفوظ رہے۔
پولیس کے مطابق ملزمان جڑواں شہروں میں اسٹریٹ کرائم کی متعدد وارداتوں میں ملوث و مطلوب تھے۔ پولیس نے جب موٹر سائیکل سواروں کو روکنے کی کوشش کی تو ملزمان نے فائرنگ شروع کر دی۔
واقعہ کی اطلاع پر سینئر پولیس افسران نفری کے ہمراہ موقع پر پہنچے اور فرار ملزمان کی گرفتاری کے لیے سرچ آپریشن جاری ہے۔
سی پی او سید خالد ہمدانی نے پولیس پارٹی کی جوانمردی سے فائرنگ کا مقابلہ کرنے پر ایس پی پوٹھوہار، ایس ڈی پی او کینٹ اور تھانہ نصیرآباد پولیس کو شاباش دی اور کہا کہ شہریوں کی جان و مال سے کھیلنے اور پولیس پر حملہ کرنے والے قانون کی گرفت سے نہیں بچ سکتے۔
