ممبئی: بھارتی فلم انڈسٹری کے نامور اداکار اور کامیڈی کے بادشاہ اسرانی طویل علالت کے بعد 84 سال کی عمر میں ممبئی میں انتقال کر گئے۔
خاندانی ذرائع کے مطابق اسرانی گزشتہ کئی ماہ سے بیمار تھے اور اسپتال میں زیرِ علاج تھے، جہاں وہ پیر کی صبح خالقِ حقیقی سے جا ملے۔
اسرانی کو بالی ووڈ کی کلاسک فلم شعلے (1975) میں “جیلر” کے یادگار کردار سے غیر معمولی شہرت ملی، جس کا مشہور جملہ “ہم انگریزوں کے زمانے کے جیلر ہیں” آج بھی مداحوں کے ذہنوں میں تازہ ہے۔
اداکار نے اپنے طویل فنی کیریئر میں 300 سے زائد فلموں میں اداکاری کے جوہر دکھائے۔ ان کی نمایاں فلموں میں آپ کی قسم، چپکے چپکے، نمک حرام، چھوٹی بہو، اور جدائی شامل ہیں۔
راجستھان کے شہر جے پور میں 1940 میں پیدا ہونے والے اسرانی نے 1960 کی دہائی میں فلمی دنیا میں قدم رکھا۔ ان کا مخصوص اندازِ گفتگو، مونچھوں کو موڑنے کا انداز، اور چہرے کے تاثرات نے انھیں مزاحیہ اداکاری کا منفرد چہرہ بنا دیا۔
ان کے انتقال پر فلمی دنیا کے ستاروں اور مداحوں نے گہرے دکھ کا اظہار کیا ہے۔ ہدایتکاروں اور اداکاروں نے سوشل میڈیا پر خراجِ عقیدت پیش کرتے ہوئے کہا کہ اسرانی کا فن اور کردار ہمیشہ یاد رکھے جائیں گے.
