کراچی: شرافی گوٹھ کے علاقے میں برطرف کیے گئے ملازم نے فائرنگ کرکے بریانی سینٹر کے مالک کو زخمی کردیا۔
ایس ایچ او شرافی گوٹھ قمر عباس کے مطابق واقعہ لانڈھی دلدار ہوٹل کے قریب پیش آیا جہاں فائرنگ سے 31 سالہ یاسر ولد خواجہ محمد زخمی ہوا۔ زخمی کو طبی امداد کے لیے جناح اسپتال منتقل کردیا گیا۔
پولیس کے مطابق ابتدائی تحقیقات میں معلوم ہوا ہے کہ زخمی یاسر بریانی سینٹر کا مالک ہے جس نے چند روز قبل اپنے ملازم کو نوکری سے نکالا تھا۔ زخمی کے بیان کے مطابق اسی سابقہ ملازم نے فائرنگ کرکے اسے زخمی کیا اور موقع سے فرار ہوگیا۔ پولیس نے واقعے کی تفتیش شروع کردی ہے۔
