صدر آصف علی زرداری اور قطر کے امیر شیخ تمیم بن حمد الثانی نے بدھ کو دوحہ میں ملاقات کے دوران پاکستان اور قطر کے تاریخی تعلقات کو مزید مضبوط اور گہرا کرنے کے عزم کا اعادہ کیا۔
قطر کے امیر نے پاکستان کی ترقی پر فخر کا اظہار کیا اور قطری ترقی میں پاکستانی کمیونٹی کے کردار کو سراہا۔ انہوں نے کہا کہ وہ پاکستان سے مزید ہنرمند افراد کو قطر میں خوش آمدید کہنے کے منتظر ہیں۔ صدر زرداری نے حکومت اور عوامِ پاکستان کی جانب سے نیک خواہشات کا پیغام پہنچایا اور شیخ تمیم کی قیادت میں قطر کی شاندار کامیابیوں کی تعریف کی۔
دونوں رہنماؤں نے دفاع، زراعت، غذائی تحفظ اور دفاعی پیداوار سمیت مختلف اہم شعبوں میں تعاون کے فروغ پر بات چیت کی۔ امیر قطر نے صدر زرداری کی تجاویز کا خیر مقدم کیا اور متعلقہ قطری حکام کو پاکستانی ہم منصبوں کے ساتھ تعاون تیز کرنے کی ہدایت دی۔
گفتگو کے دوران امیر قطر نے حالیہ پاکستان۔سعودی عرب اسٹریٹجک باہمی دفاعی معاہدے کو “بروقت اور مثبت قدم” قرار دیا۔ انہوں نے کہا کہ پاکستان کے چین، مغربی ممالک اور خلیجی ریاستوں کے ساتھ مضبوط سفارتی تعلقات اسے عالمی سطح پر منفرد مقام عطا کرتے ہیں۔
صدر زرداری نے دوحہ امن عمل اور خطے میں استحکام کے لیے قطر کے تعمیری کردار کو سراہا، بالخصوص افغانستان کے حوالے سے قطر کی کوششوں کی تعریف کی۔ امیر قطر نے امید ظاہر کی کہ پاکستان اور افغانستان باہمی سمجھ بوجھ اور تعاون کو مزید فروغ دیں گے۔
ملاقات کے اختتام پر شیخ تمیم نے صدر زرداری کی دعوت قبول کر لی اور اگلے سال کے اوائل میں پاکستان کے دورے پر آمادگی ظاہر کی۔ ملاقات میں چیئرمین پیپلز پارٹی بلاول بھٹو زرداری اور قطر میں تعینات پاکستانی سفیر بھی موجود تھے
