راولپنڈی: نیشنل سائبر کرائم انوسٹی گیشن ایجنسی (این سی سی آئی اے) نے کارروائی کرتے ہوئے سوشل میڈیا پر فیک نیوز اور غلط معلومات پھیلانے والے تین افراد کو گرفتار کرلیا۔
این سی سی آئی اے کے مطابق جھوٹی خبروں کے ذریعے خوف و ہراس پھیلانے پر ملزمان کے خلاف مقدمہ درج کیا گیا ہے۔ ایف آئی آر نمبر 186/2025 پریوینشن آف الیکٹرانک کرائمز ایکٹ 2016 کے تحت درج کی گئی، جس میں ملزمان پر آن لائن پروپیگنڈا اور گمراہ کن معلومات پھیلانے کے الزامات عائد کیے گئے ہیں۔
ترجمان کے مطابق کارروائی این سی سی آئی اے سائبر کرائم رپورٹنگ سینٹر راولپنڈی نے انسپکٹر محمد توصیف کی نگرانی میں کی۔
گرفتار ملزمان کی شناخت محمد سفیان، راجب علی اور عالیان آصف کے ناموں سے ہوئی ہے، جبکہ ان کے قبضے سے موبائل فون اور دیگر ڈیجیٹل آلات تحویل میں لے لیے گئے۔
این سی سی آئی اے نے واضح کیا کہ سوشل میڈیا پر خوف، افواہیں اور انتشار پھیلانے والوں کے خلاف سخت قانونی کارروائی جاری رہے گی۔
