کراچی: شہر قائد کے علاقے منگھوپیر میں نورانی ہوٹل کے قریب پولیس اور مسلح ڈکیت گینگ کے درمیان مبینہ مقابلہ ہوا، جس کے نتیجے میں دو ملزمان زخمی اور پانچ گرفتار کر لیے گئے۔
ایس ایس پی ویسٹ طارق الٰہی مستوئی کے مطابق ملزمان تاجر فہد کو لوٹنے کی کوشش کر رہے تھے کہ پولیس نے موقع پر پہنچ کر انہیں گھیر لیا، جس پر فائرنگ کا تبادلہ ہوا۔
فائرنگ کے نتیجے میں دو ملزمان محمد عارف اور شاہ رخ زخمی ہوئے جبکہ ایک ساتھی ہارون رشید سمیت تین دیگر کو بھی گرفتار کرلیا گیا۔ پولیس کے مطابق دو ملزمان موقع سے فرار ہونے میں کامیاب ہوگئے۔
پولیس نے گرفتار ملزمان کے قبضے سے دو پستول، تاجر سے چھینا گیا موبائل فون، موٹر سائیکل، نقدی اور دیگر قیمتی سامان برآمد کیا۔
زخمی ملزمان کو فوری طور پر اسپتال منتقل کیا گیا جبکہ دیگر گرفتار ملزمان کو مزید تفتیش کے لیے تھانے منتقل کردیا گیا۔
ایس ایس پی ویسٹ نے بتایا کہ فرار ہونے والے ملزمان کی گرفتاری کے لیے چھاپے مارے جا رہے ہیں اور واقعے کی تحقیقات جاری ہیں۔
