کراچی: پاکستان پیپلزپارٹی (پی پی پی) کی سینٹرل ایگزیکٹو کمیٹی (سی ای سی) کا اجلاس کل تک ملتوی کردیا گیا، تاہم اجلاس میں آئین کے آرٹیکل 243 میں ترمیم کی تجاویز کو منظور کرلیا گیا۔
اجلاس کے بعد میڈیا بریفنگ میں چیئرمین پیپلزپارٹی بلاول بھٹو زرداری نے بتایا کہ سی ای سی نے 27ویں آئینی ترمیم کی تجویز کے تمام نکات کو — ایک کے سوا — مسترد کردیا ہے۔
انہوں نے کہا کہ مسلم لیگ (ن) کا ایک وفد پیپلزپارٹی کے پاس آیا تھا اور 27ویں آئینی ترمیم کی حمایت کی درخواست کی، تاہم پیپلزپارٹی اس تجویز کی حمایت کرنے کے لیے تیار نہیں۔
بلاول بھٹو نے بتایا کہ سی ای سی نے صرف آرٹیکل 243 سے متعلق حکومتی تجاویز کی حمایت کی ہے، جب کہ باقی تمام نکات کو مکمل طور پر مسترد کردیا گیا ہے۔
ان کا کہنا تھا کہ پیپلزپارٹی نے این ایف سی فارمولے میں تبدیلی کی تجویز بھی رد کردی ہے، جب کہ آئینی عدالت کے حوالے سے پارٹی کی رائے ہے کہ چاروں صوبوں کو مساوی نمائندگی دی جائے۔
بلاول بھٹو زرداری نے مزید بتایا کہ سی ای سی کا اجلاس نمازِ جمعہ کے بعد دوبارہ ہوگا، جس میں آئینی عدالت کے قیام سے متعلق حتمی فیصلہ کیا جائے گا۔
