بابوسر ٹاپ اور ناران جھلکھڈ روٹ شدید برفباری کے باعث بند، پولیس نے متبادل راستے کی ہدایت جاری کردی
(منصہرہ) — شدید سردی اور بھاری برفباری کے باعث بابوسر ٹاپ اور ناران–جھلکھڈ روٹ ہر قسم کی ٹریفک کے لیے غیر محفوظ قرار دے دیا گیا ہے۔ منصہرہ پولیس نے عوام کی حفاظت کے پیشِ نظر علاقے سے چیک پوسٹس عارضی طور پر ہٹا دی ہیں اور مسافروں کو متبادل راستہ، قراقرم (سلک روڈ) استعمال کرنے کی ہدایت کی ہے۔
پولیس کے مطابق ناران سے باروائی تک کا راستہ فی الحال کھلا ہے، تاہم بابوسر ٹاپ کی جانب جانے والی سڑک مکمل طور پر بند کر دی گئی ہے۔ حکام نے مسافروں سے اپیل کی ہے کہ وہ غیر ضروری سفر سے گریز کریں اور روانگی سے قبل موسم اور ٹریفک کی تازہ ترین صورتحال ضرور معلوم کریں۔
محکمۂ موسمیات کے مطابق حالیہ برفباری کے باعث علاقے میں درجہ حرارت نقطۂ انجماد سے نیچے جا چکا ہے اور مزید برفباری کا امکان ظاہر کیا جا رہا ہے، جس کے پیشِ نظر انتظامیہ نے ہنگامی اقدامات شروع کر دیے ہیں۔
سیاحتی مقامات پر برفباری سے لطف اندوز ہونے والے شہریوں کو ہدایت کی گئی ہے کہ وہ صرف محفوظ علاقوں تک محدود رہیں اور پولیس و مقامی انتظامیہ کی ہدایات پر عمل کریں تاکہ کسی بھی ناخوشگوار واقعے سے بچا جا سکے۔
