جارجیا: معروف امریکی گلوکار ایکن (Akon) کو گزشتہ ہفتے امریکی ریاست جارجیا کے علاقے ڈی کالب کاؤنٹی (DeKalb County) میں پولیس نے حراست میں لیا، تاہم انہیں تقریباً چھ گھنٹے بعد رہا کر دیا گیا۔
رپورٹس کے مطابق چیمبلی پولیس ڈیپارٹمنٹ کے اہلکاروں نے ایکون کو اس وقت گرفتار کیا جب ٹنٹ ورلڈ (Tint World) نامی آٹو اسٹائلنگ سینٹر کے باہر موجود سیکیورٹی کیمروں نے ایک ایسی گاڑی کی نشاندہی کی جس کے خلاف وارنٹ جاری تھا۔
پولیس موقع پر پہنچی تو گاڑی کے مالک کی شناخت معروف گلوکار ایکن کے طور پر ہوئی۔ حکام کے مطابق انہوں نے گرفتاری کے دوران کسی قسم کی مزاحمت نہیں کی اور مکمل تعاون کیا۔
پولیس ریکارڈ کے مطابق ایکون کو تقریباً چھ گھنٹے تک جیل میں رکھا گیا، جس کے بعد باقاعدہ قانونی کارروائی مکمل ہونے پر انہیں رہا کر دیا گیا۔ ذرائع کا کہنا ہے کہ یہ وارنٹ روس ویل پولیس ڈیپارٹمنٹ نے جاری کیا تھا۔
واضح رہے کہ چند ماہ قبل پولیس نے ایکون کا ڈرائیونگ لائسنس معطل کر دیا تھا، جب ان کی ٹیسلا سائبر ٹرک بیٹری ختم ہونے کے باعث سڑک پر بند ہو گئی تھی۔
52 سالہ ایکون نے اب تک اس واقعے پر کوئی بیان جاری نہیں کیا، تاہم اطلاعات کے مطابق وہ اس وقت بھارت میں اپنے میوزک ٹور پر موجود ہیں۔
