مدینہ کے قریب عمرہ زائرین کی بس کے ایک ڈیزل ٹینکر سے ٹکرانے اور آگ لگنے کے باعث درجنوں بھارتی زائرین جان کی بازی ہار گئے، جن کی تدفین جنت البقیع کے مقدس قبرستان میں کیے جانے کی تیاری جاری ہے۔
مکہ اور مدینہ کے درمیان ہائی وے پر سفر کے دوران بس میں تصادم کے بعد آتشزدگی ہوئی، جس کے نتیجے میں زیادہ تر افراد جاں بحق ہو گئے جبکہ صرف ایک شخص زندہ بچ پایا۔
جا ں بحق ہونے والے بیشتر زائرین کا تعلق بھارتی ریاست تلنگانہ خصوصاً حیدرآباد سے تھا، جو عمرہ ادا کر کے مدینہ جا رہے تھے۔
حکومتی کارروائی اور شناخت کا عمل
حادثے کے بعد بھارتی حکومت اور قونصل خانہ جدہ نے ہنگامی رابطہ مراکز قائم کر دیے ہیں جبکہ لاشوں کی شناخت ڈی این اے کے ذریعے کی جا رہی ہے، جس کے بعد تدفین کا عمل مکمل کیا جائے گا۔
جنت البقیع میں تدفین کی وجہ
اہل خانہ نے اس خواہش کا اظہار کیا ہے کہ ان کے پیاروں کو جنت البقیع میں سپرد خاک کیا جائے، جہاں رسول اکرم ﷺ کے قریبی اصحاب اور اہل بیتؓ بھی مدفون ہیں۔
سانحے نے بھارت خصوصاً تلنگانہ کے متاثرہ خاندانوں کو شدید صدمے سے دوچار کیا ہے۔ لوگ جاں بحق زائرین کی مغفرت اور لواحقین کے لیے صبر کی دعا کر رہے ہیں۔
