ورلڈ ٹیسٹ چیمپئن جنوبی افریقہ نے بدھ کے روز بھارت کو 549 رنز کے ہدف کے تعاقب میں صرف 140 رنز پر ڈھیر کر کے دوسرے ٹیسٹ میں 408 رنز سے شاندار کامیابی حاصل کی۔ یوں پروٹیز نے 25 سال بعد بھارت میں پہلی ٹیسٹ سیریز جیتنے کا کارنامہ سر انجام دیا۔
گواہٹی میں 2-0 سے مکمل ہونے والی اس فتح نے بھارت کو گھریلو میدان پر رنز کے لحاظ سے تاریخ کی سب سے بھاری شکست دے دی۔ گزشتہ سال نیوزی لینڈ کے ہاتھوں 3-0 کی وائٹ واش کے بعد یہ بھارت کی سات گھریلو ٹیسٹ میچز میں پانچویں ناکامی ہے۔
36 سالہ آف اسپنر سائمن ہرمر پوری اننگز کے ہیرو رہے جنہوں نے 37 رنز کے عوض 6 وکٹیں حاصل کیں۔ یہ جنوبی افریقہ کی بھارت میں مجموعی طور پر دوسری سیریز جیت ہے، پہلی کامیابی 2000 میں ہنسی کرونیے کی قیادت میں ملی تھی۔
رویندر جڈیجا نے 54 رنز کے ساتھ مزاحمت کی، مگر کیشا مہاراج نے انہیں اسٹمپ کروا کر پویلین بھیجا اور پھر آخری کھلاڑی محمد سراج کو بھی آؤٹ کیا، جس پر مارکو یانسن نے باؤنڈری پر شاندار کیچ لیا۔
بھارت نے کولکتہ میں کھیلا گیا پہلا ٹیسٹ بھی تین دن کے اندر ہار دیا تھا، جہاں وکٹ پر غیر معمولی باؤنس تھا۔ دوسرے ٹیسٹ میں بھی جنوبی افریقہ نے بھارت کو اُن کی ہی کنڈیشنز میں اسپن کے ذریعے آؤٹ کلاس کر دیا، حالانکہ وکٹ بیٹنگ کے لیے سازگار سمجھی جا رہی تھی۔
مہمان ٹیم نے چوتھے روز اپنی دوسری اننگز 260-5 پر ڈکلیئر کی، جس کے بعد بھارت کو ایک تاریخی ہدف ملا لیکن بھارتی بیٹنگ لائن ایک بار پھر دباؤ میں آگئی اور کبھی بھی مقابلہ کرتی نظر نہ آئی۔
دن کے آغاز میں بھارت کو کچھ قسمت کا سہارا بھی ملا جب مارکو یانسن نے سائی سدرشن کو آؤٹ کیا مگر گیند نو بال قرار پائی۔ اگلے اوور میں ایڈن مرکرم نے سلپ میں کلدیپ یادیو کا آسان کیچ بھی چھوڑ دیا۔
لیکن بھارتی خوش قسمتی زیادہ دیر نہ چل سکی۔ ہرمر نے پہلے کلدیپ کو پانچ رنز پر بولڈ کیا، پھر تین گیندوں بعد دھروو جریال کو دو رنز پر آؤٹ کیا اور کچھ دیر بعد کپتان رشبھ پنت کو 13 رنز پر چلتا کیا۔ بھارت کا اسکور 58-5 ہو چکا تھا۔
پروٹیز نے پہلی اننگز میں بیٹنگ کا انتخاب کرتے ہوئے 489 رنز بنائے تھے، جب کہ بھارت پہلی اننگز میں صرف 201 رنز پر ڈھیر ہو کر 288 رنز کا بڑا خسارہ دے بیٹھا۔ تاہم پروٹیز نے فالو آن دینے کے بجائے دوبارہ بیٹنگ کو ترجیح دی۔
مارکو یانسن نے گیند اور بیٹ دونوں سے شاندار کارکردگی دکھائی — پہلی اننگز میں 6-48 لیے، جب کہ بیٹ سے 93 رنز کی جارحانہ اننگز کھیلی۔
ادھر آل راؤنڈر سینوران متھوسامی نے اپنے ٹیسٹ کیریئر کی پہلی سنچری بناتے ہوئے 109 رنز کی بہترین اننگز کھیلی۔
