کراچی: ضلع ملیر پولیس نے کارروائی کرتے ہوئے مالک سے بھتہ طلب کرنے میں ملوث ڈرائیور کو گرفتار کر لیا، پولیس کے مطابق ملزم نے 80 لاکھ روپے بھتہ مانگا تھا۔
پولیس بیان کے مطابق مقدمہ ایف آئی آر نمبر 516/2025 تھانہ ملیر کینٹ میں دفعات 384 اور 385 کے تحت درج کیا گیا تھا۔ مدعی نے بتایا تھا کہ اسے فون کال اور بھتے کی پرچی کے ذریعے رقم دینے کا مطالبہ کیا گیا، جبکہ انکار پر جان سے مارنے کی دھمکیاں بھی موصول ہوئیں۔
ملیر کینٹ پولیس نے خفیہ اطلاع اور جدید ٹیکنالوجی کی مدد سے کارروائی کرتے ہوئے ملزم داؤد خان کو گرفتار کیا، جو تفتیش کے دوران ملزم کے مالک کا ذاتی ڈرائیور نکلا۔
پولیس کے مطابق گرفتار ملزم نے دوران تفتیش اپنے جرم کا اعتراف بھی کر لیا۔ ملزم کے خلاف قانونی کارروائی جاری ہے جبکہ مزید تحقیقات کے لیے اسے CIA/SIU کے سپرد کر دیا گیا ہے۔
ایس ایس پی ملیر کا کہنا ہے کہ شہریوں کے تحفظ اور جرائم کے خاتمے کے لیے ملیر پولیس ہر وقت مستعد ہے۔
