بانی پی ٹی آئی سے ملاقات نہ ہونے پر وزیرِاعلیٰ خیبر پختونخوا سہیل آفریدی کی جانب سے راولپنڈی کے گورکھ پور ناکے پر دیا گیا دھرنا ختم ہوگیا۔ بعد ازاں وہ گورکھ پور سے اسلام آباد روانہ ہوگئے۔
ذرائع کے مطابق وزیرِاعلیٰ کے پی نے علامہ ناصر عباس اور محمود خان اچکزئی سے مشاورت کے بعد دھرنا ختم کرنے کا فیصلہ کیا۔
اطلاعات کے مطابق منگل کو دوبارہ اڈیالہ جیل آنے کی تجویز پر اتفاق ہوا ہے، جبکہ فیملی ملاقات کے روز کارکنوں کو بھی آنے کی ہدایت دی جائے گی۔
ذرائع کا کہنا ہے کہ وزیرِاعلیٰ خیبر پختونخوا نے دھرنے کے حوالے سے اپوزیشن اتحاد کو پہلے سے اعتماد میں نہیں لیا تھا۔ دھرنا شروع ہونے کے چار گھنٹے بعد انہوں نے اپوزیشن اتحاد کی قیادت سے صورتحال سنبھالنے کے لیے رابطہ کیا۔
سہیل آفریدی کی خواہش تھی کہ دھرنا ختم کرنے کا اعلان اپوزیشن اتحاد کی قیادت کی جانب سے کیا جائے۔
محمود خان اچکزئی نے میڈیا کو بتایا کہ وزیرِاعلیٰ خیبر پختونخوا بانی پی ٹی آئی سے ملاقات نہ کرائے جانے کے معاملے پر آج صبح ہائیکورٹ سے رجوع کریں گے۔
