پاکستان کے ٹی ٹوئنٹی کپتان سلمان علی آغا، ٹیسٹ کپتان شان مسعود اور تجربہ کار آل راؤنڈر شعیب ملک سمیت 42 پاکستانی کرکٹرز بی پی ایل 2026 کی نیلامی میں رجسٹرڈ ہو گئے ہیں۔ نیلامی 30 نومبر کو منعقد ہوگی، جس میں 245 اوورسیز کھلاڑی پانچ کیٹیگریز میں شامل کیے گئے ہیں۔
بی پی ایل 2026 اس بار اہم تبدیلیوں کے ساتھ آ رہا ہے، کیونکہ لیگ میں ٹیموں کی تعداد سات سے کم ہو کر پانچ رہ گئی ہے۔ ڈھاکہ کیپیٹلز اور رنگپور رائیڈرز برقرار ہیں، جبکہ چیٹاگانگ کنگز، دربار راج شاہی اور سلہٹ اسٹرائیکرز کے اخراج کے بعد تین نئی ملکیت والی ٹیمیں—چٹاگانگ رائلز، راج شاہی واریرز اور سلہٹ ٹائٹنز—ایونٹ میں شامل ہوں گی۔ دفاعی چیمپئن فورچون بریشل اور کھلنا ٹائیگرز اس بار حصہ نہیں لیں گے۔
بنگلہ دیش کرکٹ بورڈ نے ٹیموں کی شرکت کی تصدیق تو کر دی ہے، تاہم نئی ملکیت سے متعلق تفصیلات ابھی جاری نہیں کی گئیں۔ نیلامی سے قبل کئی بڑے نام فرنچائزز پہلے ہی اپنے اسکواڈ میں شامل کر چکے ہیں۔ پاکستان کے اسپنر ابرار احمد چٹاگانگ رائلز کا حصہ بن گئے ہیں، جبکہ سائم ایوب، معین علی، محمد عامر اور عظمت اللہ عمرزئی سلہٹ ٹائٹنز کے اسکواڈ میں شامل ہو چکے ہیں۔
ڈھاکہ کیپیٹلز نے انگلینڈ کے اسٹار ایلیکس ہیلز اور پاکستان کے عثمان خان کو باضابطہ طور پر سائن کر لیا ہے، جبکہ کوسل مینڈس نوکھالی ایکسپریس کا حصہ بن گئے ہیں۔ پاکستانی کھلاڑی کیٹیگری اے سے ای تک شامل ہیں، جن میں شعیب ملک، شان مسعود، سلمان آغا، زمان خان، محمد حارث، عامر جمال، آصف علی، سعود شکیل، حیدر علی، عثمان قادر، رومان رئیس اور متعدد دیگر نام شامل ہیں۔
توقع ہے کہ اس بار نیلامی خاصی دلچسپ ہوگی کیونکہ تمام فرنچائزز نئے سیزن کے لیے اپنی ٹیموں کو مضبوط بنانے کی کوشش کریں گی۔
