بھارتی کرکٹ ٹیم کے سابق کپتان ویرات کوہلی نے جنوبی افریقہ کے خلاف پہلے ون ڈے میں شاندار سنچری بنانے کے بعد ٹیسٹ کرکٹ میں ممکنہ واپسی سے متعلق تمام قیاس آرائیوں کو مسترد کردیا۔
بھارتی میڈیا میں یہ خبریں گردش کر رہی تھیں کہ بی سی سی آئی اور کوہلی کے درمیان ٹیسٹ فارمیٹ میں دوبارہ کھیلنے پر بات چیت ہو سکتی ہے، لیکن میچ کے بعد گفتگو کرتے ہوئے 37 سالہ کوہلی نے دو ٹوک الفاظ میں کہا کہ وہ اب صرف ایک ہی فارمیٹ میں حصہ لیں گے اور ٹیسٹ کرکٹ میں واپسی کا کوئی امکان موجود نہیں۔
کوہلی کا کہنا تھا، ’’میں اب 37 برس کا ہوں اور جسمانی ریکوری کے لیے وقت درکار ہوتا ہے۔ میں اب صرف ایک فارمیٹ کھیل رہا ہوں۔ 300 سے زائد میچ کھیلنے کے بعد آپ سمجھ جاتے ہیں کہ آپ کی فٹنس اور ریفلیکسز کس سطح پر ہیں۔‘‘ انہوں نے مزید کہا کہ جب تک آپ اچھی کارکردگی دکھا رہے ہیں، ذہنی طور پر مضبوط ہیں اور جسمانی طور پر تیار ہیں، تب تک آپ کھیل جاری رکھتے ہیں۔
اس سے قبل بی سی سی آئی کے سیکریٹری دیوجیت سائقیا بھی ان تمام خبروں کو بے بنیاد قرار دے چکے ہیں۔
ان کا کہنا تھا کہ کوہلی کے حوالے سے زیر گردش خبریں صرف قیاس آرائیاں ہیں اور اس بارے میں کسی قسم کی بات چیت نہیں کی گئی۔
یاد رہے کہ کوہلی نے مئی میں ٹیسٹ کرکٹ چھوڑنے کا اعلان کیا تھا۔ انہوں نے اپنے ٹیسٹ کیریئر میں 123 میچز میں 9 ہزار 230 رنز اور 30 سنچریاں اسکور کیں۔
