واپڈا کے سمیع اللّٰہ خان اور فائقہ ریاض نے نیشنل گیمز میں بالترتیب ملک کے تیز ترین مرد اور خاتون ایتھلیٹ ہونے کا اعزاز حاصل کرلیا۔
امریکا سے تعلق رکھنے والی ایتھلیٹ نورین حسین نے خواتین کے پول والٹ مقابلے میں پاکستان آرمی کی نمائندگی کرتے ہوئے گولڈ میڈل جیتا۔
نیشنل گیمز کے سب سے اہم مقابلے ایتھلیٹکس میں پیر کے روز 100 میٹر ریس نے سب کی توجہ حاصل کی۔ مردوں کی 100 میٹر ریس میں سخت مقابلہ ہوا جس میں واپڈا کے سمیع اللّٰہ خان نے 10.30 سیکنڈز میں فاصلہ طے کرکے پہلی پوزیشن حاصل کی۔ آرمی کے عثمان نے سلور جبکہ راشد ریاض نے برانز میڈل جیتا۔
خواتین کی 100 میٹر ریس میں بھی واپڈا کی اولمپئن فائقہ ریاض سب سے آگے رہیں۔ انہوں نے 11.7 سیکنڈز میں فاصلہ طے کرکے پاکستان کی تیز ترین خاتون ایتھلیٹ کا لقب اپنے نام کیا۔ ایچ ای سی کی خاولہ عمر نے سلور جبکہ آرمی کی تامین خان نے برانز میڈل حاصل کیا۔
پاکستان نیوی اسپورٹس کمپلیکس میں ہونے والے مقابلوں میں جیولن تھرو کا ایونٹ نمایاں رہا، جہاں پاکستان کے اولمپک چیمپئن ارشد ندیم نے 81.81 میٹر تھرو کے ساتھ گولڈ میڈل اپنے نام کیا۔ یاسر سلطان نے سلور اور ابرار نے برانز میڈل حاصل کیا۔
خواتین کے پول والٹ مقابلے میں امریکا سے آئی نورین حسین نے 2.90 میٹر کی جمپ کے ساتھ گولڈ میڈل جیت کر شاندار کارکردگی دکھائی۔
دیگر مقابلوں میں بھی کئی ایتھلیٹس نے بہترین کارکردگی دکھائی:
واپڈا کی ماریہ نے خواتین کی 10 ہزار میٹر ریس جیتی
آرمی کے طلحہ سلیم نے اسٹیپل چیز میں کامیابی حاصل کی
نیوی کے انصر عباس لانگ جمپ میں فاتح رہے
واپڈا کی نورین فاطمہ نے خواتین کی ہائی جمپ جیتی
آرمی کے جمشید علی نے شاٹ پٹ میں گولڈ میڈل لیا
محمد اختر نے مردوں کی 5 ہزار میٹر ریس اپنے نام کی
ایتھلیٹکس ایونٹ میں منگل کو مزید 12 گولڈ میڈلز کا فیصلہ ہونا باقی ہے۔
