“کراچی میں بے قابو واٹر ٹینکرز نے ایک اور جان لے لی”

کراچی: شہر میں پانی کے بے لگام ٹینکروں کی خطرناک ڈرائیونگ ایک اور زندگی نگل گئی۔ منگل کے روز نوجوان عابد تیز رفتار ٹینکر کی زد میں آکر موقع پر ہی جاں بحق ہوگیا۔ یہ سانحہ گزشتہ روز ننھے ابراہیم کی ٹینکر حادثے میں ہلاکت کے بعد پیش آیا۔

دونوں گھروں میں کہرام برپا ہے، تاہم شہریوں کی جانب سے شدید غم و غصے کے باوجود صوبائی حکومت کی جانب سے تاحال کوئی واضح ردِعمل سامنے نہیں آیا۔

شہریوں نے سندھ حکومت کی نااہلی اور ٹینکر مافیا کی بے لگامی پر شدید تنقید کرتے ہوئے کہا ہے کہ کراچی مسلسل بدانتظامی اور عدم توجہی کا شکار ہے۔

جاں بحق عابد کے والد نے ذمہ داروں کے خلاف سخت کارروائی اور مستقل حفاظتی اقدامات کا مطالبہ کیا ہے تاکہ معصوم جانوں کا مزید ضیاع روکا جاسکے۔