راولپنڈی کے علاقے مورگاہ میں گھر میں چوری کی واردات کی تفتیش کے دوران پولیس نے گھریلو ملازمہ کے والد کو بھی گرفتار کر لیا ہے۔
ترجمان راولپنڈی پولیس کے مطابق مسروقہ طلائی زیورات فروخت کر کے حاصل کی گئی رقم میں سے مزید 5 لاکھ 50 ہزار روپے برآمد کیے گئے ہیں۔ اس سے قبل گھریلو ملازمہ کو گرفتار کر کے زیورات کی فروخت سے حاصل ہونے والی 3 لاکھ 50 ہزار روپے کی رقم برآمد کی جا چکی ہے۔
پولیس کا کہنا ہے کہ دورانِ تفتیش ملازمہ کے انکشاف پر اس کے والد کو شاملِ تفتیش کیا گیا، جس نے اپنی بیٹی کے ساتھ مل کر طلائی زیورات چرانے اور فروخت کرنے کا اعتراف کیا۔
یہ مقدمہ گزشتہ ماہ درج کیا گیا تھا۔ پولیس کے مطابق زیرِ حراست ملزم کو ٹھوس شواہد کے ساتھ چالان کر کے عدالت پیش کیا جائے گا تاکہ اسے قانون کے مطابق سزا دلوائی جا سکے۔
