کرکٹ اور فٹبال کی دنیا کے دو عظیم ستارے، سچن ٹنڈولکر اور لیونل میسی ایک ہی جگہ جمع ہو گئے، جس کی تصاویر سوشل میڈیا پر تیزی سے وائرل ہو گئیں۔
بھارت کے دورے پر آئے ارجنٹائن کے عالمی کپ فاتح کپتان لیونل میسی کی ممبئی کے وانکھیڈے اسٹیڈیم میں بھارتی کرکٹ لیجنڈ سچن ٹنڈولکر سے ملاقات ہوئی، جو شائقین کے لیے ایک تاریخی لمحہ بن گئی۔
سچن ٹنڈولکر نے اس ملاقات کی تصویر اپنے سوشل میڈیا اکاؤنٹ پر شیئر کی، جو چند ہی لمحوں میں مداحوں کی توجہ کا مرکز بن گئی۔ اس موقع پر دونوں عظیم کھلاڑی ایک ساتھ موجود تھے اور 10 نمبر کی جرسی نمایاں طور پر دکھائی دے رہی تھی۔
ملاقات کے دوران سچن ٹنڈولکر نے اپنی مشہور 10 نمبر کی جرسی لیونل میسی کو پیش کی، جبکہ میسی نے جواباً بھارتی لیجنڈ کو 2026 فیفا ورلڈ کپ کی آفیشل فٹ بال تحفے میں دی۔
تصویر کے کیپشن میں سچن ٹنڈولکر نے لکھا کہ آج واقعی 10/10 کا دن ہے۔
یہ امر بھی قابلِ ذکر ہے کہ سچن ٹنڈولکر اور لیونل میسی دونوں اپنے اپنے کھیلوں میں 10 نمبر کی جرسی پہچان کے طور پر پہنتے رہے ہیں۔
سوشل میڈیا پر اس ملاقات کو مداحوں کی جانب سے خوب سراہا گیا اور دلچسپ تبصروں کی بھرمار دیکھنے میں آئی۔
اس سے قبل لیونل میسی نے وانکھیڈے اسٹیڈیم میں نمائشی پینلٹی کک بھی لی اور نوجوان کھلاڑیوں کے ساتھ کھیل میں حصہ لیا۔
