کراچی (07 اپریل 2026) — سندھ حکومت نے صوبے میں کھیلوں کے فروغ اور نوجوانوں کو بہتر مواقع فراہم کرنے کے لیے اہم اقدام اٹھاتے ہوئے 10 اسپورٹس کمپلیکسز کو اپ گریڈ کر کے انہیں باقاعدہ اسپورٹس کلبز کا درجہ دے دیا ہے۔ اس حوالے سے وزیر کھیل و امور نوجوانان سندھ سردار محمد بخش مہر کی زیر صدارت ایک اہم اجلاس منعقد ہوا جس میں متعلقہ افسران نے شرکت کی اور اس فیصلے کی باضابطہ منظوری دی گئی۔
اجلاس میں ہدایت جاری کی گئی کہ نئے قائم ہونے والے اسپورٹس کلبز میں نوجوانوں کو جدید سہولیات، تربیتی مواقع اور باقاعدہ ممبرشپ فراہم کی جائے تاکہ وہ مثبت سرگرمیوں کی جانب راغب ہوں اور اپنی صلاحیتوں کو بہتر انداز میں نکھار سکیں۔
دوسری جانب کرکٹ کے فروغ کے لیے بھی اہم پیش رفت سامنے آئی جہاں پاکستان کرکٹ بورڈ کے تعاون سے صوبائی کرکٹ ٹیم کی تشکیل پر غور کیا گیا۔ اس سلسلے میں ہونے والے اجلاس میں سیکریٹری کھیل منور علی مہیسر، سابق قومی کرکٹرز یونس خان اور صادق محمد سمیت دیگر اہم شخصیات شریک ہوئیں۔ اجلاس میں پاکستان کپ میں شرکت کے لیے سندھ کی نمائندہ ٹیم کے انتخاب پر تفصیلی مشاورت کی گئی۔
وزیر کھیل سردار محمد بخش مہر نے واضح ہدایات جاری کیں کہ ٹیم کی تشکیل مکمل میرٹ پر کی جائے تاکہ حقیقی باصلاحیت کھلاڑیوں کو آگے آنے کا موقع مل سکے اور صوبے کا مثبت امیج اجاگر ہو۔ اس موقع پر سابق کپتان یونس خان کا کہنا تھا کہ سندھ میں کرکٹ کا بے پناہ ٹیلنٹ موجود ہے، جسے اگر درست مواقع اور رہنمائی دی جائے تو وہ قومی سطح پر نمایاں کارکردگی دکھا سکتا ہے۔
حکام کے مطابق گلستان جوہر، ناظم آباد، حیدرآباد، سکھر، گھوٹکی، میرپورخاص، جیکب آباد سمیت دیگر شہروں میں قائم کیے گئے اسپورٹس کلبز میں نوجوانوں اور شہریوں کو ممبرشپ کی سہولت دستیاب ہوگی، جس سے نہ صرف کھیلوں کو فروغ ملے گا بلکہ صحت مند معاشرے کی تشکیل میں بھی مدد ملے گی
