پاکستان کرکٹ ٹیم کے سابق کپتان جاوید میانداد طبیعت کی خرابی کے باعث اسپتال پہنچ گئے۔
میڈیا رپورٹس کے مطابق دل کی تکلیف کی شکایت پر جاوید میانداد کو کراچی میں واقع نیشنل انسٹیٹیوٹ آف کارڈیو ویسکیولر ڈیزیز (این آئی سی وی ڈی) منتقل کیا گیا، جہاں ڈاکٹروں نے ان کا تفصیلی معائنہ کیا۔
ضروری طبی ٹیسٹس اور اینجیوگرافی کے بعد ڈاکٹروں نے رپورٹ کا جائزہ لیا اور انہیں مکمل طور پر صحت مند قرار دیتے ہوئے گھر جانے کی اجازت دے دی۔
جاوید میانداد نے این آئی سی وی ڈی میں فراہم کی جانے والی سہولیات پر اطمینان کا اظہار کیا۔ اسپتال سے روانگی سے قبل ان کا کہنا تھا کہ وہ اب خود کو کافی بہتر محسوس کر رہے ہیں اور اللّٰہ کے فضل اور قوم کی دعاؤں سے ان کی صحت میں مزید بہتری آئے گی۔
