عالمی شہرت یافتہ فٹبال اسٹار اور ارجنٹائن کو ورلڈ کپ جتوانے والے کپتان لیونل میسی کے حالیہ دورۂ بھارت کے دوران ایک نہایت مہنگی گھڑی نے سب کی توجہ حاصل کر لی ہے، جس کی مالیت تقریباً 11 کروڑ روپے بتائی جا رہی ہے۔
بھارتی میڈیا رپورٹس کے مطابق میسی کو بھارت میں مختلف مواقع پر ایک نایاب اور لگژری گھڑی پہنے دیکھا گیا، جس کی تصاویر سامنے آنے کے بعد فیشن اور قیمتی اشیا میں دلچسپی رکھنے والوں میں خاصی چہ مگوئیاں شروع ہو گئیں۔
میسی کی کلائی پر نظر آنے والی یہ گھڑی رچرڈ ملے ایشیا ایڈیشن بتائی جا رہی ہے، جس کے دنیا بھر میں صرف 12 پیس تیار کیے گئے ہیں۔ اس گھڑی کو اس کی محدود دستیابی اور خطیر قیمت کے باعث انتہائی خاص سمجھا جاتا ہے۔
رپورٹس کے مطابق لیونل میسی نے یہ گھڑی جام نگر میں واقع ونتارا وائلڈ لائف کنزرویشن سینٹر کے دورے کے دوران پہننی شروع کی، جس کے بعد یہ قیاس آرائیاں زور پکڑ گئیں کہ ممکنہ طور پر یہ گھڑی انہیں اننت امبانی کی جانب سے تحفے میں دی گئی ہے۔
سوشل میڈیا پر بھی اس حوالے سے تصاویر اور دعوے گردش کر رہے ہیں۔ بتایا جا رہا ہے کہ بھارت آمد کے وقت میسی نے یہ گھڑی نہیں پہن رکھی تھی، تاہم بعد ازاں وہ اسی گھڑی کے ساتھ نظر آئے۔
بھارتی میڈیا کا کہنا ہے کہ فی الحال اس بات کی باضابطہ تصدیق نہیں ہو سکی کہ یہ گھڑی کس نے تحفے میں دی، البتہ اس کی نایابی، قیمت اور محدود ایڈیشن ہونے کی وجہ سے یہ موضوع بدستور خبروں اور سوشل میڈیا پر زیرِ بحث ہے۔
