کراچی ایکسپو سینٹر میں جاری پانچ روزہ کراچی ورلڈ بک فیئر (KWBF) میں دوسرے دن بھی شائقینِ کتب کی بڑی تعداد نے شرکت کی، جہاں پبلشرز اور بک سیلرز کی جانب سے کتابیں 30 سے 50 فیصد تک رعایتی قیمت پر فروخت کی جارہی ہیں۔
میلے میں صبح سے ہی اسکولوں، کالجوں، جامعات اور مدارس کے طلبہ کے علاوہ ادبی، مذہبی، سماجی اور صحافتی شخصیات نے شرکت کی اور اپنی پسند کی کتابیں خریدیں۔ شائقین کا کہنا تھا کہ وہ پورا سال اس بک فیئر کا انتظار کرتے ہیں کیونکہ یہاں معیاری کتابیں مناسب قیمت پر دستیاب ہوتی ہیں۔
منتظمین کے مطابق بک فیئر میں نجی بینک کی جانب سے اے ٹی ایم وین کی سہولت فراہم کی گئی ہے جو میلے کے آخری دن تک موجود رہے گی، جبکہ کسی بھی ہنگامی صورتِ حال کے لیے ایمبولینس اور فوری طبی امداد کا بھی انتظام کیا گیا ہے۔
شہریوں کا کہنا تھا کہ جدید ٹیکنالوجی کے دور میں بھی کتاب کی اہمیت کم نہیں ہوئی اور کراچی ورلڈ بک فیئر شہر کی پہچان بن چکا ہے۔ بچوں، نوجوانوں، خواتین اور بزرگوں سمیت ہر عمر کے افراد کی شرکت اس بات کا ثبوت ہے کہ اہلِ کراچی علم اور کتاب سے محبت کرتے ہیں۔
واضح رہے کہ کراچی ایکسپو سینٹر میں جاری کراچی ورلڈ بک فیئر 22 دسمبر بروز پیر تک جاری رہے گا۔
