جرمن اکیڈمک ایکسچینج سروس (DAAD) نے 2025 کے لیے اپنے مشہور ای پی او ایس (ڈیولپمنٹ ریلیٹڈ پوسٹ گریجویٹ کورسز) اسکالرشپ پروگرام کی درخواستیں کھول دی ہیں، جس کے تحت ترقی پذیر اور نئی صنعتی ممالک کے پیشہ ور افراد جرمنی میں مکمل فنڈڈ ماسٹرز اور پی ایچ ڈی کی تعلیم حاصل کر سکتے ہیں۔
اسکالرشپ میں ماہانہ وظیفہ (ماسٹرز کے لیے €992 اور پی ایچ ڈی کے لیے €1,300)، صحت اور انشورنس، سفری اخراجات، اور ممکنہ طور پر کرایہ یا فیملی سپورٹ شامل ہے۔ پروگرام کی مدت 12 سے 42 ماہ تک ہے، جو کورس کے لحاظ سے مختلف ہوتی ہے۔
اہلیت کے لیے درخواست دہندگان کے پاس متعلقہ شعبے میں کم از کم دو سال کا تجربہ، عام طور پر چار سالہ بیچلر ڈگری، اور ترقیاتی مقاصد کے ساتھ واضح عزم ہونا ضروری ہے۔ پروگرام کا مقصد ترقی پذیر ممالک میں مستقبل کے رہنماؤں کی تیاری ہے تاکہ وہ سرکاری، نجی، اور سول سوسائٹی کے شعبوں میں کام کر سکیں۔
انتخاب کے اہم معیار میں عمدہ تعلیمی کارکردگی، پیشہ ورانہ تجربہ ، ترقیاتی جذبہ، اور سماجی ذمہ داری شامل ہیں۔ صرف DAAD کی منظور شدہ پوسٹ گریجویٹ کورسز اہل ہوں گے۔
مزید تفصیلات اور اہل ممالک کی مکمل فہرست کے لیے سرکاری DAAD ویب سائٹ ملاحظہ کریں۔
