لاہور کی اچھرہ جیولری مارکیٹ سے 20 کلو سونا غائب ہونے کے معاملے میں اہم پیشرفت سامنے آئی ہے۔
پولیس ذرائع کے مطابق وسیم اختر نامی تاجر نہ صرف دیگر تاجروں بلکہ اپنی سوتیلی والدہ گلریزہ اختر کا سونا لے کر بھی مبینہ طور پر غائب ہو گیا۔ اس حوالے سے اچھرہ تھانے میں گلریزہ اختر کی مدعیت میں ایک اور مقدمہ درج کر لیا گیا ہے۔
مدعیہ کے مطابق انہوں نے ڈھائی کلو سے زائد سونا امانتاً وسیم اختر کے پاس رکھوایا تھا، جس کی مالیت سات کروڑ 42 لاکھ روپے سے زائد بتائی جا رہی ہے۔
پولیس کا کہنا ہے کہ 20 کلو سونا غائب ہونے کے واقعے پر اب تک مجموعی طور پر سات مقدمات درج ہو چکے ہیں۔ نامزد ملزم وسیم اختر کی ٹریول ہسٹری بھی حاصل کر لی گئی ہے اور جلد اس کی گرفتاری متوقع ہے۔
