کراچی کے علاقے ڈیفنس میں بدر کمرشل کے قریب ایک موبائل فون شاپ میں ڈکیتی کی واردات پیش آئی، جہاں مسلح ڈاکو لاکھوں روپے مالیت کے 40 سے زائد موبائل فون لوٹ کر فرار ہو گئے۔ واقعے کا نوٹس لیتے ہوئے وزیر داخلہ سندھ ضیاء الحسن لنجار نے ایس ایس پی ساؤتھ سے تفصیلی رپورٹ طلب کر لی ہے۔
صدر کراچی موبائل اینڈ الیکٹرانکس ڈیلرز ایسوسی ایشن منہاج گلفام کے مطابق متاثرہ دکاندار نے بتایا ہے کہ ڈاکو 90 لاکھ روپے سے زائد مالیت کے 40 سے زیادہ موبائل فون چھین کر لے گئے۔
ایسوسی ایشن کی جانب سے اعلیٰ پولیس حکام سے مطالبہ کیا گیا ہے کہ فوری طور پر ملزمان کو گرفتار کر کے لوٹا گیا سامان برآمد کرایا جائے۔
وزیر داخلہ سندھ نے واضح ہدایات جاری کرتے ہوئے کہا ہے کہ شہریوں اور تاجروں کے جان و مال کا تحفظ حکومت کی اولین ترجیح ہے اور اس حوالے سے کسی قسم کی کوتاہی برداشت نہیں کی جائے گی۔ انہوں نے ملزمان کی فوری گرفتاری اور لوٹے گئے موبائل فونز کی جلد برآمدگی کو یقینی بنانے کے احکامات دیے۔
وزیر داخلہ نے ہدایت کی کہ جدید تفتیشی ٹیکنالوجی اور پروفیشنل پولیسنگ کے تمام وسائل بروئے کار لائے جائیں اور واردات میں ملوث سہولت کاروں کو بھی قانون کے کٹہرے میں لایا جائے۔ انہوں نے جرائم پیشہ گروہوں کے خلاف ٹارگٹڈ اور انٹیلی جنس بیسڈ کارروائیاں مزید تیز کرنے کی بھی ہدایت کی۔
پولیس حکام کے مطابق ملزمان کی تلاش کے لیے سی سی ٹی وی فوٹیجز اور دیگر شواہد کی مدد لی جا رہی ہے جبکہ تفتیش کی پیش رفت سے متعلق وزیر داخلہ کو باقاعدگی سے آگاہ کیا جائے گا۔
