کراچی: وفاقی تحقیقاتی ادارے (ایف آئی اے) کے کمرشل بینکنگ سرکل کراچی نے کارروائی کرتے ہوئے حوالہ ہنڈی اور غیر قانونی کرنسی ایکسچینج میں ملوث منظم گروہ کے ایک اہم کارندے کو گرفتار کرلیا۔
ترجمان ایف آئی اے کے مطابق کارروائی ڈی جی ایف آئی اے کی ہدایت پر کی گئی، جس کا مقصد حوالہ ہنڈی اور غیر قانونی زرمبادلہ کے کاروبار میں ملوث عناصر کے خلاف کریک ڈاؤن کو مزید مؤثر بنانا ہے۔
ترجمان نے بتایا کہ ملزم احمد رضا کو آدم جی نگر کے علاقے سے گرفتار کیا گیا، جب کہ چھاپے کے دوران ملزم کے قبضے سے ایک کروڑ 50 لاکھ روپے نقدی اور حوالہ ہنڈی سے متعلق ڈیجیٹل شواہد برآمد ہوئے۔
ایف آئی اے کے مطابق ملزم برآمد ہونے والی رقم کے بارے میں تسلی بخش وضاحت پیش نہ کرسکا۔ مزید تفتیش جاری ہے اور نیٹ ورک کے دیگر کارندوں کی گرفتاری کے لیے چھاپے مارے جا رہے ہیں۔
