نیشنل سائبر کرائم انویسٹی گیشن ایجنسی (این سی سی آئی اے) اسلام آباد نے خاتون کے سوشل میڈیا اکاؤنٹس تک غیر قانونی رسائی، ڈیٹا چوری اور نازیبا تصاویر کے ذریعے بلیک میل کرنے میں ملوث ملزم کو گرفتار کر کے مقدمہ درج کر لیا ہے۔
حکام کے مطابق متاثرہ خاتون کی شکایت پر کارروائی کی گئی، جس میں الزام عائد کیا گیا کہ ملزم رضوان اللہ نے غیر قانونی طور پر ان کے سوشل میڈیا اکاؤنٹس ہیک کر کے ذاتی ڈیٹا حاصل کیا اور بعد ازاں قابل اعتراض تصاویر واٹس ایپ کے ذریعے بھیج کر بلیک میل کیا۔
این سی سی آئی اے کی جانب سے کی گئی انکوائری میں الزامات درست ثابت ہونے پر تفتیشی افسر سب انسپکٹر مصباح بتول کی سربراہی میں ٹیم نے چھاپہ مار کارروائی کرتے ہوئے ملزم کو گرفتار کر لیا۔
حکام کا کہنا ہے کہ ملزم نے موبائل فون کے ذریعے خاتون کو دھمکیاں دیں اور رقم نہ دینے کی صورت میں تصاویر وائرل کرنے کی دھمکی دے کر بلیک میل کیا۔
ملزم کے قبضے سے برآمد ہونے والے موبائل فون کی تکنیکی و فرانزک جانچ رپورٹ میں بھی جرم کے ناقابل تردید شواہد سامنے آئے، جس کے بعد ملزم کے خلاف پیکا ایکٹ 2016 کی دفعات 21 اور 24 کے تحت مقدمہ درج کر لیا گیا ہے، جبکہ مزید تفتیش جاری ہے۔
