پاکستان کے معروف کانٹینٹ کریئیٹر اور یوٹیوبر عرفان جونیجو نے فوڈ اینڈ بیوریجز کے شعبے میں قدم رکھتے ہوئے کراچی میں اپنے کافی آؤٹ لیٹ ’ڈرنک لوپ‘ کا آغاز کر دیا ہے۔ آؤٹ لیٹ کے افتتاح کے بعد سوشل میڈیا پر صارفین کی جانب سے تصاویر اور ریویوز شیئر کیے جا رہے ہیں، جس کے باعث یہ کیفے تیزی سے توجہ حاصل کر رہا ہے۔
ابتدائی تفصیلات کے مطابق ڈرنک لوپ کا مقصد عام صارفین کے لیے سستی اور روزمرہ استعمال کی کافی فراہم کرنا ہے۔ مینو میں لاٹے، آئسڈ کافی، فرپیز، میچا ڈرنکس اور ہاٹ چاکلیٹ شامل ہیں، جن کی قیمتیں مہنگے کیفے چینز کے مقابلے میں کم رکھی گئی ہیں۔
یہ کافی آؤٹ لیٹ ڈی ایچ اے فیز 8، کراچی میں واقع ہے، جس کا ڈیزائن سادہ اور نوجوانوں کو مدنظر رکھتے ہوئے تیار کیا گیا ہے، جو عرفان جونیجو کی ڈیجیٹل شناخت سے ہم آہنگ ہے۔ اس اقدام کے ذریعے عرفان جونیجو نے ڈیجیٹل کانٹینٹ کریئیشن سے آگے بڑھتے ہوئے آف لائن کاروبار میں باقاعدہ انٹری دی ہے۔
افتتاح کے بعد سے ڈرنک لوپ کو عوام کی جانب سے مثبت ردِعمل موصول ہو رہا ہے، خاص طور پر مناسب قیمتوں اور آسان رسائی کے باعث، جس نے اسے شہر کے نمایاں نئے کافی اسپاٹس میں شامل کر دیا ہے۔
