نیویارک — ہالی ووڈ کی معروف گلوکارہ ماریہ کیری نے موسیقی کی دنیا کے بے تاج بادشاہ کلائیو ڈیوس کے انتقال پر گہرے دکھ کا اظہار کرتے ہوئے انہیں شاندار خراجِ عقیدت پیش کیا ہے۔ کلائیو ڈیوس پیر کے روز مین ہٹن میں واقع اپنے گھر میں 94 برس کی عمر میں انتقال کر گئے تھے۔
منگل کے روز ماریہ کیری نے اپنے انسٹاگرام اکاؤنٹ پر کلائیو ڈیوس کے ساتھ دو یادگار تصاویر شیئر کرتے ہوئے لکھا کہ ڈیوس "میوزک انڈسٹری کا ایک بہت بڑا ستون اور بہترین موسیقی کے حقیقی سرپرست تھے”۔ انہوں نے اپنی پوسٹ کے آخر میں دعا کرتے ہوئے لکھا کہ "عظیم اور لیجنڈری کلائیو ڈیوس کی روح کو ابدی سکون ملے”۔
موسیقی کی دنیا میں "سونے جیسے کان رکھنے والا انسان” کے نام سے مشہور کلائیو ڈیوس نے کئی دہائیوں تک امریکی راک اور پاپ میوزک کی سمت کا تعین کیا۔ انہوں نے اپنے کیریئر کا آغاز ایک کارپوریٹ وکیل کے طور پر کیا تھا، لیکن بعد میں وہ ریکارڈنگ انڈسٹری میں آئے اور نئے ٹیلنٹ کو نکھارنے اور ہٹ گانے تیار کرنے میں منفرد شہرت حاصل کی۔ یہ ان کی دور اندیشی ہی تھی جس نے وٹنی ہوسٹن، باب ڈیلن اور بروس اسپرنگسٹین جیسے عالمی شہرت یافتہ گلوکاروں کو انڈسٹری میں متعارف کروایا اور ان کے کیریئر کو بلندیوں پر پہنچایا۔
خاندانی ذرائع کے مطابق کلائیو ڈیوس گزشتہ کچھ عرصے سے سانس کی تکلیف کے باعث ہسپتال میں زیرِ علاج تھے۔ ان کے اہلخانہ نے فیس بک پر ان کے انتقال کی تصدیق کرتے ہوئے کہا کہ وہ ایک ایسی لیجنڈ شخصیت تھے جن کے کام نے کروڑوں لوگوں کی زندگیوں کو متاثر کیا، جبکہ وہ ایک بہترین والد اور دادا بھی تھے جنہوں نے خاندان کو ہمیشہ محبت اور طاقت دی۔ 80 سال کی عمر سے تجاوز کرنے کے بعد بھی ڈیوس انڈسٹری میں سرگرم رہے اور نوجوان گلوکاروں کی رہنمائی کرتے رہے۔ کلائیو ڈیوس کے انتقال کی خبر سامنے آنے کے بعد دنیا بھر کے نامور فنکاروں کی جانب سے تعزیت کا سلسلہ جاری ہے۔
