پنجاب میں دو ادویات کے مخصوص بیچز جعلی قرار دے کر فوری واپسی کا حکم دے دیا گیا۔
پرائمری اینڈ سیکنڈری ہیلتھ کیئر ڈیپارٹمنٹ (ڈرگز کنٹرول ونگ) کا ہنگامی پبلک نوٹس جاری کردیا، ڈی-جیسٹ 10 ملی گرام اور گیبیکا 300 ملی گرام کے مخصوص بیچز اسپوریئس قرار دیے گئے۔
ڈرگ ٹیسٹنگ لیبارٹری پنجاب کی رپورٹ میں ادویات غیر معیاری ثابت ہوئیں، بیچ نمبر DGH007 (ایکسپائری اپریل 2027) جب کہ بیچ نمبر 518C27 (ایکسپائری جولائی 2027) بھی غیر معیاری نکلا۔
اِسی طرح ڈرگز ایکٹ 1976 کے تحت کارروائی کی گئی، فوری مارکیٹ سے اسٹاک اٹھانے کی ہدایت جاری کی گئی، مینوفیکچررز اور ڈسٹری بیوٹرز کو رپورٹ ڈریپ کو جمع کرانے کا حکم دیا گیا۔
ڈاکٹروں، فارمیسیز اور اسپتالوں کو فروخت و استعمال فوری روکنے کی ہدایت کی گئی اور صوبہ بھر میں نگرانی سخت کی جا رہی ہے، خلاف ورزی پر قانونی کارروائی کا انتباہ کیا گیا۔
محکمہ صحت نے اپیل کی ہے کہ عوام مذکورہ بیچز ہرگز استعمال نہ کریں، مضر اثر کی صورت میں فوری اطلاع دیں، شہری صرف مستند اور لائسنس یافتہ فارمیسیز سے ادویات خریدیں۔
