وزیراعظم شہباز شریف نے سعودی عرب کے ولی عہد اور وزیراعظم محمد بن سلمان سے ٹیلیفون پر گفتگو کی، جس میں بحیرہ احمر میں تجارتی جہازوں پر حوثیوں کے حالیہ حملوں کی شدید مذمت کرتے ہوئے انہیں "ناقابل قبول” قرار دیا۔
وزیراعظم نے کہا کہ ایسے حملے نہ صرف علاقائی امن و استحکام بلکہ عالمی بحری تجارت اور بین الاقوامی تجارتی راستوں کے لیے بھی سنگین خطرہ ہیں۔ انہوں نے سعودی عرب کے ساتھ پاکستان کی مکمل یکجہتی کا اظہار کرتے ہوئے خطے میں امن، استحکام اور محفوظ بحری گزرگاہوں کی حمایت کا اعادہ کیا۔
دونوں رہنماؤں نے مشرق وسطیٰ کی مجموعی سکیورٹی صورتحال پر بھی تبادلہ خیال کیا اور کشیدگی کم کرنے، سفارتی کوششوں کو فروغ دینے اور علاقائی تعاون کو مزید مضبوط بنانے کی ضرورت پر زور دیا۔
وزیراعظم شہباز شریف اور ولی عہد محمد بن سلمان نے پاکستان اور سعودی عرب کے درمیان برادرانہ تعلقات کو مزید مستحکم بنانے اور علاقائی و عالمی امور پر قریبی تعاون جاری رکھنے کے عزم کا اظہار بھی کیا۔
