نیویارک — نیویارک سٹی کے میئر زہران ممدانی نے معروف امریکی میگزین رولنگ اسٹون کو دیے گئے ایک انٹرویو میں اپنی منفرد اور متنوع میوزک پلے لسٹ کا انکشاف کیا ہے، جس میں انہوں نے بتایا کہ وہ پاکستانی سنگر اور ریپر شمعون اسماعیل کے پرانے مداح ہیں اور انہیں برسوں سے سن رہے ہیں۔ جنوبی ایشیائی اور مشرقی افریقی پس منظر رکھنے والے میئر ممدانی نے بتایا کہ وہ شمعون اسماعیل کے پنجابی انڈی پاپ اور ہپ ہاپ میوزک کو کافی عرصے سے فالو کر رہے ہیں اور حال ہی میں ان کے گانوں کو اور بھی زیادہ سن رہے ہیں۔
موسیقی سے اپنے گہرے لگاؤ کے بارے میں بات کرتے ہوئے نیویارک کے میئر نے کہا کہ یہ دنیا اور اس میں اپنے مقام کو سمجھنے کا ایک اہم ذریعہ ہے۔ یوگنڈا میں پیدا ہونے والے زہران ممدانی کی پلے لسٹ میں یوگنڈا کے مشہور سنگر جوڑے ‘ریڈیو اینڈ ویزل’ کے گانے بھی شامل ہیں، جبکہ وہ موڈ کے حساب سے امریکی کنٹری میوزک اسٹار کیسی مسگریوز کو بھی سنتے ہیں۔ انہوں نے نیویارک میں بیتے اپنے بچپن کو یاد کرتے ہوئے بتایا کہ وہ کیسے ٹاور ریکارڈز سے جے زی (Jay-Z) کے البمز خریدا کرتے تھے۔ واضح رہے کہ زہران ممدانی نے 2025 میں میئر کا الیکشن جیتنے کے بعد اپنی فتوحات کی تقریر کا اختتام بالی ووڈ کے مشہور گانے دھوم مچادے پر کیا تھا، اور ان کا یہی عوامی اور پُرجوش انداز مداحوں میں بے حد مقبول ہو رہا ہے۔
