کراچی — معروف کامیڈین علی گل پیر نے ایک مزاحیہ اور طنزیہ ویڈیو شیئر کرتے ہوئے معاشرے کے ان رویوں کو تنقید کا نشانہ بنایا ہے جہاں نئے والدین کو خوشی کے اس موقع پر مبارکباد دینے کے بجائے بن مانگے مشورے اور خوفزدہ کرنے والی باتیں سنائی جاتی ہیں۔ حال ہی میں اپنی اہلیہ ڈاکٹر عزیمہ ناخدا کے ہاں ننھے مہمان کا استقبال کرنے والے علی گل پیر نے نشاندہی کی کہ بچہ چاہے کسی بھی عمر کا ہو جائے، لوگ حوصلہ شکنی کرنے والے تبصرے کرنا کبھی بند نہیں کرتے۔
اپنی ویڈیو میں انہوں نے لوگوں کے ایسے ہی کچھ روایتی جملوں کا مذاق اڑایا جیسے کہ "اب بچہ پیدا ہو گیا ہے تو تمہاری زندگی ختم” یا "جب یہ 20 سال کا ہو کر کالج جائے گا تو تم لوگ روؤ گے”۔ اس کے علاوہ علی گل پیر نے ان مشوروں پر بھی سخت ردِعمل دیا جس میں بچوں کی پیدائش کے بعد پالتو جانوروں کو گھر سے نکالنے کا کہا جاتا ہے۔ انہوں نے واضح کیا کہ پالتو جانور کوئی عارضی کھلونا نہیں ہوتے جنہیں بچہ آنے پر پھینک دیا جائے، بلکہ تحقیق بتاتی ہے کہ جانوروں کے ساتھ بڑھنے والے بچوں میں الرجی کم ہوتی ہے اور وہ زیادہ ہمدرد بنتے ہیں۔ ویڈیو کے اختتام پر انہوں نے لوگوں کو مشورہ دیا کہ شادی یا بچے کی پیدائش جیسے بڑے فیصلوں پر دوسروں کو ڈرانے کے بجائے زندگی کے ان خوبصورت اور خوشگوار لمحات پر توجہ مرکوز کرنی چاہیے۔ واضح رہے کہ علی گل پیر نے رواں سال 21 جون کو فادرز ڈے کے موقع پر اپنے ہاں بچے کی پیدائش کی خوشخبری مداحوں سے شیئر کی تھی۔
