کراچی — معروف گلوکار، سماجی کارکن اور زندگی ٹرسٹ کے بانی شہزاد رائے نے مقبولِ عام کامیڈین اور اداکار تابش ہاشمی کے ہمراہ امریکہ میں سالانہ فنڈ ریزنگ ڈنر ٹور کا باقاعدہ اعلان کیا ہے، جو 18 سے 25 ستمبر تک مختلف امریکی شہروں میں منعقد کیا جائے گا۔ اس مہم کا بنیادی مقصد پاکستان میں سرکاری اسکولوں کے ڈھانچے کو جدید خطوط پر استوار کرنا اور عوام کو معیاری تعلیم کی اہمیت سے روشناس کرانا ہے۔ انسٹاگرام پر شیئر کی گئی ایک ویڈیو میں شہزاد رائے نے تعلیم تک آسان رسائی اور اساتذہ کے لیے باقاعدہ لائسنسنگ اور پیشہ ورانہ ڈگریوں کی ضرورت پر زور دیا۔
شہزاد رائے نے اپنے عزم کا اظہار کرتے ہوئے کہا، "وہ وقت دور نہیں جب پاکستان میں لوگوں کو تعلیم کے لیے ترستا نہیں پڑے گا اور والدین پورے اعتماد کے ساتھ اپنے بچوں کو سرکاری اسکولوں میں بھیج سکیں گے، کیونکہ وہاں بہترین مقامی اساتذہ ان کی تربیت کر رہے ہوں گے۔” انہوں نے بتایا کہ یہ ٹور شکاگو، نیو جرسی، واشنگٹن، ڈلاس، ہیوسٹن اور سان فرانسسکو جیسے شہروں کا رخ کرے گا، جہاں پاکستانی کمیونٹی کو زندگی ٹرسٹ کی کارکردگی اور مستقبل کے منصوبوں سے آگاہ کیا جائے گا۔ تابش ہاشمی کو اس مہم کا حصہ بنانے کے حوالے سے ان کا کہنا تھا کہ تابش ایک بہترین آرٹسٹ ہونے کے ساتھ ساتھ دل سے اس مقصد پر یقین رکھتے ہیں۔ واضح رہے کہ شہزاد رائے برسوں سے پاکستان میں بچوں کے حقوق، چائلڈ ابیوز کے خلاف آگاہی اور مفت و معیاری تعلیم کے لیے آواز اٹھانے والی ایک معتبر ترین شخصیت ہیں۔
