لاس اینجلس — نامور امریکی اداکارہ کامیلا مینڈس نے مقبول ترین نوجوانوں کی ڈراما سیریز کی شوٹنگ کے دوران شدید ذہنی دباؤ، خوف کے دورے اور کھانے پینے کے عارضے کا شکار ہونے کا اعتراف کیا ہے۔ جے شیٹی کے مشہور پوڈ کاسٹ میں گفتگو کرتے ہوئے اداکارہ نے اپنی ذہنی صحت کی گرتی ہوئی صورتحال اور اس کی وجوہات پر کھل کر بات کی۔ کامیلا کا کہنا تھا کہ ہر وقت پرفیکٹ اور خوبصورت دکھنے کی خواہش نے ان کے اندر کے پرانے ذہنی مسائل کو دوبارہ بیدار کر دیا، جن کا سامنا وہ ہائی اسکول کے زمانے سے کر رہی تھیں۔ انہوں نے بتایا کہ ڈرامے میں ان کے کردار ‘ویرونیکا لاج’ کے لباس انتہائی تنگ، مختصر اور پیٹ دکھانے والے ہوتے تھے، جس کی وجہ سے وہ اکثر شدید عدم تحفظ کا شکار ہو جاتی تھیں۔
اداکارہ نے تفصیلات بتاتے ہوئے کہا کہ جس دن وہ خود کو جسمانی طور پر اچھا محسوس نہیں کر رہی ہوتی تھیں، اس دن بھی انہیں ایسے ملبوسات پہننے پڑتے تھے جو ان کی ذہنی کیفیت کو مزید خراب کر دیتے تھے، اور اسی وجہ سے کیمرے کے سامنے جانے سے پہلے انہیں اکثر خوف کے دورے پڑتے تھے۔ انہوں نے اعتراف کیا کہ وہ خود کو بہت بدصورت محسوس کرتی تھیں لیکن شوٹنگ کی مجبوری کے باعث اپنے جذبات کا اظہار نہیں کر پاتی تھیں۔ کامیلا کے مطابق، جب وہ رونا چاہتی تھیں اور کام کے ماحول کی وجہ سے اپنے آنسو روکتی تھیں، تو یہی چیز ان کے خوف کے دورے کی وجہ بنتی تھی۔ واضح رہے کہ یہ سیریز جنوری 2017 میں شروع ہوئی تھی اور 7 سیزنز مکمل کرنے کے بعد اگست 2023 میں اختتام پذیر ہوئی۔
