کنگنا رناوت کا احتجاجی طلبہ کے خلاف توہین آمیز بیان؛ بھارتی وزیرِ تعلیم کے استعفیٰ کا مطالبہ کرنے والوں پر تنقید

نئی دہلی — بالی ووڈ اداکارہ اور حکمران جماعت کی رکنِ پارلیمنٹ کنگنا رناوت اپنے حالیہ توہین آمیز بیان کی وجہ سے ایک بار پھر شدید تنقید اور تنازع کی زد میں آ گئی ہیں۔ بھارتی وزیرِ تعلیم دھرمیندر پردھان کے استعفیٰ کے لیے احتجاج کرنے والے طلبہ کے خلاف فوٹو اینڈ ویڈیو شیئرنگ ایپ انسٹاگرام پر نازیبا اور تضحیک آمیز زبان استعمال کرنے پر کنگنا کا بیان سوشل میڈیا پر وائرل ہو گیا، جس پر عوامی حلقوں کی طرف سے شدید ردِعمل سامنے آیا ہے۔ تنازع کے اس طوفان میں معروف اداکارہ راکھی ساونت بھی کود پڑیں اور انہوں نے ایک ویڈیو پیغام میں کنگنا کو شدید تنقید کا نشانہ بناتے ہوئے کہا کہ ملک کے نوجوانوں اور بیٹیوں کے خلاف تضحیک آمیز زبان استعمال کرنا کسی صورت قابلِ قبول نہیں ہے۔ راکھی نے طنزیہ انداز میں پوچھا کہ آپ نے ممبر آف پارلیمنٹ بننے کے لیے ایسا کون سا بڑا تیر مارا ہے، اور اگر آپ آج دوبارہ الیکشن لڑیں تو شاید ایک ووٹ بھی نہ جیت سکیں۔ انہوں نے دو ہزار چوبیس کے چنڈی گڑھ ایئرپورٹ واقعے کا حوالہ دیتے ہوئے کنگنا کو خبردار کیا کہ اگر انہوں نے عوام اور طلبہ کے خلاف ایسے ہی تفرقہ انگیز بیانات جاری رکھے تو انہیں مستقبل میں شدید عوامی ردِعمل کا سامنا کرنا پڑ سکتا ہے۔