اسلام آباد — کویت کے وزیرِ خارجہ شیخ جراح جابر الاحمد الصباح اپنے سرکاری دورے کے اختتام پر اسلام آباد سے روانہ ہو گئے ہیں۔ دورے کے دوران انہوں نے جی ایچ کیو راولپنڈی میں چیف آف ڈیفنس فورسز اور آرمی چیف فیلڈ مارشل عاصم منیر سے ملاقات کی، جس میں علاقائی سلامتی، باہمی دلچسپی کے امور اور دوطرفہ دفاعی تعاون کو مزید فروغ دینے پر تبادلہ خیال کیا گیا۔ فیلڈ مارشل عاصم منیر نے کویت کے ساتھ دیرینہ تعلقات کے عزم کا اعادہ کرتے ہوئے کہا کہ دونوں ممالک خطے میں امن اور خوشحالی کا مشترکہ وژن رکھتے ہیں، جبکہ کویتی وزیرِ خارجہ نے علاقائی امن کے لیے پاکستان کے مخلصانہ کردار کو سراہا۔
قبل ازیں، وزیرِ اعظم شہباز شریف اور نائب وزیراعظم و وزیرِ خارجہ اسحاق ڈار نے کویتی ہم منصب کا پرتپاک استقبال کیا۔ وزیراعظم ہاؤس میں ہونے والی ملاقاتوں میں تجارت، سرمایہ کاری، توانائی، انفارمیشن ٹیکنالوجی، زراعت اور دفاع سمیت مختلف شعبوں میں تعاون بڑھانے پر اتفاق کیا گیا۔ فریقین نے مشرق وسطیٰ کی موجودہ صورتحال اور علاقائی سلامتی پر بھی تفصیلی گفتگو کی، جہاں وزیراعظم شہباز شریف نے کویت کے ساتھ یکجہتی کا اظہار کرتے ہوئے خطے میں کشیدگی کم کرنے کے لیے پاکستان کے مصالحانہ کردار پر روشنی ڈالی۔ کامیاب دورے کے بعد کویتی وزیرِ خارجہ اسلام آباد انٹرنیشنل ایئرپورٹ سے اپنے وطن روانہ ہو گئے۔
