کراچی: پاکستان پٹرولیم ڈیلرز ایسوسی ایشن نے جمعرات کو اعلان کیا ہے کہ حکومت کے ساتھ مذاکرات ناکام ہوگئے ہیں، جس کے بعد پٹرولیم ڈیلرز 15 اگست سے ملک بھر میں غیر معینہ مدت کے لیے ہڑتال کریں گے۔
ایسوسی ایشن کے چیئرمین ملک خدا بخش کے مطابق مذاکرات کے دوران حکومت نے پٹرولیم مصنوعات کی قیمتوں میں روزانہ ردوبدل کے نظام میں تبدیلی سے انکار کردیا۔ تاہم حکومت نے ڈیلرز کے منافع میں فی لیٹر ایک روپے 34 پیسے اضافے پر غور کرنے کی یقین دہانی کرائی ہے، جس کی منظوری وفاقی کابینہ سے مشروط ہوگی۔
ایسوسی ایشن کے مطابق مذاکرات کے بعد ڈیلرز کا وفد کراچی روانہ ہوگیا اور ایگزیکٹو کمیٹی کا ہنگامی اجلاس بھی طلب کیا گیا۔ پٹرولیم ڈیلرز نے ہفتہ کی صبح سے ملک بھر میں پٹرول پمپس بند کرنے کے فیصلے پر قائم رہنے کا اعلان کیا ہے۔
دوسری جانب آل پاکستان گڈز ٹرانسپورٹ الائنس نے بھی وفاقی اور سندھ حکومت کے ساتھ مذاکرات ناکام ہونے کے بعد ملک گیر ہڑتال جاری رکھنے کا اعلان کیا ہے۔
الائنس کے صدر ملک شہزاد اعوان نے کہا کہ مطالبات منظور ہونے اور باقاعدہ نوٹیفکیشن جاری ہونے تک ہڑتال جاری رہے گی۔ ان کے مطابق ملک بھر میں ٹرانسپورٹرز کی ہڑتال چھٹے روز میں داخل ہوگئی ہے۔
انہوں نے ملک بھر کے ٹرانسپورٹرز سے اپیل کی کہ وہ پرامن رہیں اور احتجاج کے دوران کہیں بھی سڑکیں بلاک نہ کریں۔
