زیورخ: سوئٹزرلینڈ کی سماعتی آلات بنانے والی کمپنی سونووا نے پیر کو مصنوعی ذہانت کی مدد سے حقیقی وقت میں کام کرنے والا اپنا تیسرا جدید سماعتی پلیٹ فارم متعارف کرادیا ہے۔
کمپنی کا نیا فوناك ایون پلیٹ فارم پہلے کے مقابلے میں چھوٹے اور ہلکے آلے پر مشتمل ہے، جبکہ اس میں جدید مصنوعی ذہانت استعمال کی گئی ہے۔ کمپنی کے مطابق یہ ٹیکنالوجی گفتگو کو دو گنا زیادہ واضح بنانے کے ساتھ سننے میں درکار ذہنی محنت بھی کم کرتی ہے۔
سونووا 2024 میں حقیقی وقت میں مصنوعی ذہانت استعمال کرنے والا سماعتی آلہ متعارف کرانے والی پہلی کمپنی بنی تھی، جس کا مقصد گفتگو کو پس منظر کے شور سے الگ کرنا تھا۔
سونووا کے تحقیق و ترقی کے سربراہ اینڈرز روزن گرین نے بتایا کہ نئے پلیٹ فارم میں جدید مصنوعی ذہانت کے ذریعے صارفین کو زیادہ واضح آواز اور بہتر سماعت کا تجربہ فراہم کرنے پر توجہ دی گئی ہے۔
کمپنی کے مطابق نیا پلیٹ فارم اس کے درمیانی مدت کے ترقیاتی اہداف کے حصول میں اہم کردار ادا کرسکتا ہے۔ ان اہداف پر رواں سال مارچ میں سرمایہ کاروں کی جانب سے کچھ تحفظات کا اظہار کیا گیا تھا۔
سونووا کے یورپ، مشرق وسطیٰ، افریقہ اور لاطینی امریکا کے صدر اولیور لَکس نے کہا کہ کمپنی کو توقع ہے کہ موجودہ صارفین کی جانب سے پرانے آلات کی تبدیلی اور پہلی مرتبہ سماعتی آلہ استعمال کرنے والے نئے صارفین، دونوں میں نئے پلیٹ فارم کو تیزی سے اپنایا جائے گا۔
سونووا نے نئے آلے کی قیمت ظاہر نہیں کی، تاہم اولیور لَکس کے مطابق ایون کو ابتدائی مرحلے ہی سے کمپنی کی اعلیٰ معیار کی مصنوعات کی مارکیٹ میں پوزیشن کو برقرار رکھنے کے لیے تیار کیا گیا ہے۔
نئے سماعتی پلیٹ فارم کی امریکا میں پیر کو فروخت شروع کردی گئی، جبکہ آسٹریلیا اور جرمنی، فرانس، اٹلی اور برطانیہ سمیت اہم یورپی منڈیوں میں یہ آلہ ستمبر کے وسط میں دستیاب ہوگا۔ اس کے بعد اسے مزید عالمی منڈیوں میں متعارف کرایا جائے گا۔
سونووا کے مطابق ایشیا بحرالکاہل اور لاطینی امریکا سمیت اس کی اہم عالمی منڈیوں میں کاروباری امکانات مثبت ہیں۔
چیف ایگزیکٹو ایرک برنارڈ کی قیادت میں کمپنی نے ایشیا بحرالکاہل کے خطے کو اپنی ترقی کے اہم مراکز میں شامل کیا ہے۔ بڑھتی ہوئی عمر رسیدہ آبادی کے باعث ان علاقوں میں سماعت سے متعلق مصنوعات کی طلب میں اضافے کی توقع ہے، جس سے سونووا کو اپنی فروخت اور مارکیٹ میں موجودگی مزید بڑھانے کا موقع مل سکتا ہے۔
