کراچی: اے آر وائی نیوز کی رپورٹ کے مطابق کراچی کے مختلف بازاروں میں 5 ہزار روپے کے جعلی کرنسی نوٹوں کی گردش کی اطلاعات سامنے آئی ہیں، جس کے بعد تاجروں، کاروباری شخصیات اور عام شہریوں کو مالی لین دین کے دوران شدید احتیاط برتنے کی ہدایت کی گئی ہے۔
مارکیٹوں میں جعلی نوٹوں کی موجودگی نے تاجر برادری میں شدید تشویش کی لہر دوڑا دی ہے۔ جعل ساز عوام اور دکانداروں کو دھوکہ دینے کے لیے مختلف ہتھکنڈے استعمال کرتے ہوئے یہ جعلی نوٹ مارکیٹ میں کھپا رہے ہیں۔
کراچی الیکٹرانکس ڈیلرز ایسوسی ایشن (کیڈا) کے صدر رضوان عرفان نے اس معاملے پر بات کرتے ہوئے تصدیق کی ہے کہ الیکٹرانکس مارکیٹ میں متعدد تاجروں کو 5 ہزار روپے کے جعلی نوٹ ملنے کے واقعات رپورٹ ہوئے ہیں، جس سے کاروبار سے وابستہ افراد میں تشویش پائی جاتی ہے۔
رضوان عرفان نے عوام اور تاجر برادری کو مشورہ دیا ہے کہ روزمرہ کے لین دین اور خریداری کے دوران 5 ہزار روپے کے نوٹوں کی اچھی طرح جانچ پڑتال کریں تاکہ کسی بھی بڑے مالی نقصان سے بچا جا سکے۔
