مانچسٹر: مانچسٹر سٹی کے اسٹار اسٹرائیکر ارلنگ ہالینڈ نے ناروے کے لیے 2026 کے فیفا ورلڈ کپ کے بعد شدید ذہنی اور جسمانی تھکن کا اعتراف کرتے ہوئے اسنیپ چیٹ پر ایک مداح کو بتایا ہے کہ لگاتار فٹبال کھیلنے کی وجہ سے ان کا "دماغ بری طرح تھک چکا ہے”۔
گول مشین کے نام سے مشہور ہالینڈ نے انکشاف کیا ہے کہ وہ کلب اور ملک کے لیے مجموعی طور پر 67 میچ کھیلنے کے بعد طویل سیزن کے باعث شدید تھکن کا شکار ہیں اور انہیں دوبارہ میدان میں اترنے سے پہلے مکمل آرام کی اشد ضرورت ہے۔ ناروے نے تقریباً تین دہائیوں کے طویل انتظار کے بعد شمالی امریکہ میں ہونے والے 2026 کے ورلڈ کپ کے کوارٹر فائنل تک رسائی حاصل کی، جس میں ارلنگ ہالینڈ نے شاندار کارکردگی کا مظاہرہ کرتے ہوئے 5 میچوں میں 7 گول اسکور کیے، جن میں برازیل کے خلاف پری کوارٹر فائنل میں اسکور کیے گئے دو اہم گول بھی شامل ہیں۔
گھریلو سطح پر بھی ہالینڈ کا بلا تعطل شاندار سفر جاری رہا، جہاں انہوں نے مانچسٹر سٹی کے لیے تمام مقابلوں میں 52 میچوں میں 38 گول اسکور کیے اور 28 گولز کے ساتھ گزشتہ چار سالوں میں اپنی تیسری پریمیئر لیگ گولڈن بوٹ ٹرافی اپنے نام کی۔ کلب اور ملک کی سطح پر مجموعی طور پر انہوں نے گزشتہ سیزن میں 68 میچوں میں 62 گول اسکور کیے۔
کھلاڑی پر کام کے بے پناہ بوجھ کو مدنظر رکھتے ہوئے مانچسٹر سٹی نے انہیں ایشیا کے پری سیزن دورے کے اسکواڈ میں شامل نہیں کیا تاکہ وہ مکمل آرام حاصل کر کے نئے سیزن کے لیے پوری طرح تیار ہو سکیں۔
